கடந்த 2024-ம் ஆண்டு வங்கதேசத்தில் நடைபெற்ற வரலாற்றுச் சிறப்புமிக்க மாணவர்களின் எழுச்சிப் போராட்டம், நாட்டின் நீண்டகாலப் பிரதமரான ஷேக் ஹசீனாவின் ஆட்சியை வீட்டுக்கு அனுப்பியது. இந்த அதிரடி மாற்றத்தைத் தொடர்ந்து, இந்தியாவில் தஞ்சம் புகுந்திருக்கும் ஷேக் ஹசீனாவை அந்நாட்டு இடைக்கால அரசு தேடப்படும் குற்றவாளியாக அறிவித்துள்ளது. இந்தச் சூழலில், ஷேக் ஹசீனாவின் மகனும், முன்னாள் தகவல் தொழில்நுட்ப ஆலோசகருமான சாஜிப் வாசெட் வெளிநாட்டு ஊடகங்களுக்கு அளித்துள்ள பேட்டி ஒன்று தெற்காசிய அரசியலில் பெரும் தீப்பற்ற வைத்துள்ளது.

வங்கதேசம் தற்போது மற்றொரு பாகிஸ்தானாக உருவெடுத்து வருவதாகவும், சர்வதேச அளவில் தேடப்படும் பயங்கரவாதிகள் கூட அங்கு சுதந்திரமாக வலம் வருவதாகவும் அவர் பகீர் குற்றச்சாட்டுகளை முன்வைத்துள்ளார். சாஜிப் வாசெட்டின் கூற்றுப்படி, கடந்த 2023-ம் ஆண்டு இந்தியாவின் போலி பாஸ்போர்ட்டைப் பயன்படுத்தியபோது அல்கொய்தா பயங்கரவாத அமைப்பின் முக்கியத் தலைவரான அபு தல்கா வங்கதேசத்தில் கைது செய்யப்பட்டுள்ளார். ஆனால், அரசியல் மாற்றங்களுக்குப் பிறகு, கடந்த அக்டோபர் 2024-ல் அவர் சிறையிலிருந்து ஜாமீனில் விடுவிக்கப்பட்டுள்ளார்.

கடந்த இரண்டு ஆண்டுகளாக நாட்டின் பல்வேறு பகுதிகளில் தனது பயங்கரவாத வலைப்பின்னலை அவர் மீண்டும் தீவிரமாக விரிவுபடுத்தி வருவதாக சாஜிப் வாசெட் எச்சரித்துள்ளார். வங்கதேசம் தற்போது தனது கட்டுப்பாட்டை இழந்து, ஒரு தோல்வியுற்ற நாடாக மாறி வருவதாகவும் அவர் கவலை தெரிவித்துள்ளார்.

கடந்த 1971-ல் பாகிஸ்தானிடமிருந்து வங்கதேசம் சுதந்திரம் பெறுவதற்காக இந்திய ராணுவம் மிகப்பெரிய தியாகத்தைச் செய்து, ரத்தம் சிந்தி உதவியது வரலாறு. ஆனால், அரை நூற்றாண்டு கடந்த நிலையில், அன்று எந்தப் பாகிஸ்தானை எதிர்த்துப் போராடினார்களோ, அதே போன்றதொரு மத அடிப்படைவாத மற்றும் உறுதியற்ற பாதைக்கு தன் தாய் நாடு திரும்பிவிட்டதாக சாஜிப் வாசெட் எழுப்பும் குற்றச்சாட்டுகள் அரசியல் அரங்கில் அதிர்வலைகளை ஏற்படுத்தியுள்ளன. ஷேக் ஹசீனா குடும்பத்தினரின் தொடர் விமர்சனங்கள் வங்கதேசத்தின் தற்போதைய அரசியல் சூழலை மேலும் சூடாக்கியுள்ளது.