தமிழக வெற்றி கழகத்தின் (தவெக) சிறப்பான ஆட்சிக்கு பைபிள் போதனைகளின்படி நடந்து கொண்டதே முக்கிய காரணம் என சபாநாயகர் ஜேசிடி பிரபாகர் பேசியிருப்பது புதிய அரசியல் விவாதத்தைக் கிளப்பியுள்ளது. பொது நிகழ்ச்சி ஒன்றில் கலந்து கொண்டு பேசிய அவர், பைபிள் வசனங்களை மேற்கோள்காட்டி தவெக அரசின் செயல்பாடுகளைப் புகழ்ந்து பேசியது சமூக வலைத்தளங்களிலும் அரசியல் வட்டாரத்திலும் பெரும் கவனத்தைப் பெற்றுள்ளது.
முன்னதாக, எஃப்எம் மரிய வில்சன் என்பவர் கிறிஸ்தவ மதப் போதனைகளைத் தமிழ் மொழியோடு ஒப்பிட்டுப் பேசிய கருத்துகள் இணையத்தில் வெளியாகிப் பலத்த சர்ச்சையை உருவாக்கியிருந்தது. அந்தச் சூடு தணிவதற்குள், தற்போது மாநிலத்தின் உயர் பொறுப்பில் இருக்கும் சபாநாயகரே பைபிளை மையப்படுத்தி தவெக ஆட்சியைப் பாராட்டியிருப்பது இந்தச் சர்ச்சையை மேலும் தீவிரப்படுத்தியுள்ளது.
இதனிடையே, முதலமைச்சர் விஜய்யின் முழுப் பெயரான ‘ஜோசப் விஜய்’ என்பதில் இருக்கும் ‘ஜோசப்’ என்ற பெயர் இப்போது திடீரென அதிகமாக முன்னிலைப்படுத்தப்படுவதன் பின்னணி என்ன என்ற கேள்வியையும் ஒரு தரப்பினர் கடுமையாக எழுப்பி வருகின்றனர். மதச்சார்பற்ற ஆட்சியில் இதுபோன்ற மத ரீதியிலான அடையாளங்களும் ஒப்பீடுகளும் தொடர்ச்சியாக முன்வைக்கப்படுவது ஏன் என்ற விவாதமும் எழுந்துள்ளது.
அரசியலமைப்புச் சட்டத்தின்படி இயங்க வேண்டிய அரசு நிர்வாகத்தை, குறிப்பிட்ட ஒரு மதப் புத்தகத்தின் போதனைகளோடு ஒப்பிட்டுப் பேசுவது ஏற்புடையதா என்ற கேள்வியை எதிர்க்கட்சிகளும் சமூக ஆர்வலர்களும் முன்வைத்து வருகின்றனர். சபாநாயகர் ஜேசிடி பிரபாகரின் இந்த பேச்சும், அதைச் சுற்றியுள்ள விமர்சனங்களும் தற்போது தமிழக அரசியல் களத்தில் பெரும் பரபரப்பை ஏற்படுத்தியுள்ளன.
