இந்தியாவின் வணிகத் தலைநகரமான மும்பையில், மனிதர்களின் அடிப்படைத் தேவையான இருப்பிடத்தை வாடகைக்கு வழங்குவதில் உணவுப் பழக்க வழக்கங்களை வைத்துப் பாகுபாடு காட்டப்படுவதாக நீண்டகாலமாகக் குற்றச்சாட்டுகள் எழுந்து வரும் நிலையில், தற்போது தார்தேவ் பகுதியில் அரங்கேறியுள்ள புதிய சர்ச்சை அம்மாநிலத்தில் பெரும் அரசியல் புயலைக் கிளப்பியுள்ளது.

தார்தேவ் பகுதியில் உள்ள ஒரு குடியிருப்பு வளாகத்தில் அசைவம் சாப்பிடுபவர்களுக்கு வீடு வழங்கப்பட மாட்டாது என்றும், சைவம் சாப்பிடுபவர்களுக்கு மட்டுமே முன்னுரிமை அளிக்கப்படும் என்றும் கூறி வீடு கேட்க வந்தவர்களிடம் அங்கிருந்தவர்கள் மறுப்பு தெரிவிக்கும் வீடியோ ஒன்று சமூக வலைதளங்களில் வெளியாகி பெரும் அதிர்வலைகளையும் கொந்தளிப்பையும் ஏற்படுத்தியுள்ளது.

இந்த வீடியோ இணையத்தில் காட்டுத்தீ போல் பரவியதைத் தொடர்ந்து, மராத்தியர்களின் உரிமைகளுக்காகப் போராடுவதாகக் கூறும் மகாராஷ்டிரா நவ்நிர்மாண் சேனா உள்ளிட்ட அரசியல் அமைப்புகள் உடனடியாகக் களத்தில் குதித்தன.

“சொந்த மாநிலத்திலேயே மராத்தி பேசும் மக்களுக்கும், அசைவ உணவை விரும்பிச் சாப்பிடுபவர்களுக்கும் வீடு மறுக்கப்படுவதை எந்தக் காலத்திலும் பொறுத்துக் கொள்ள முடியாது” என்று கூறி, எம்.என்.எஸ் தொண்டர்கள் அந்த குறிப்பிட்ட குடியிருப்புப் பகுதிக்கு நேரில் சென்று தங்களது பலத்த எதிர்ப்பைப் பதிவு செய்தனர்.

அத்துடன், சட்டத்திற்குப் புறம்பாக உணவுப் பழக்கத்தைக் காரணம் காட்டி வீடுகளை மறுக்கும் நபர்களுக்குக் கடுமையான எச்சரிக்கையையும் அவர்கள் விடுத்துள்ளனர். மும்பைப் போன்ற ஒரு சர்வதேச மாநகரத்தில், அனைத்துத் தரப்பு மக்களும் ஒன்றிணைந்து வாழும் சூழலில், இத்தகைய உணவு சார்ந்த பாகுபாடுகள் சமூக அமைதியைச் சீர்குலைக்கும் வகையில் அமைந்துள்ளதாகப் பொதுமக்கள் மற்றும் சமூக ஆர்வலர்கள் சுட்டிக்காட்டி வருகின்றனர்.

இந்திய அரசியலமைப்புச் சட்டம் ஒவ்வொரு குடிமகனுக்கும் நாட்டின் எந்தப் பகுதியிலும் வசிப்பதற்கான உரிமையை வழங்கியுள்ள நிலையில், தனியார் குடியிருப்புகள் என்ற பெயரில் இத்தகைய வாய்மொழி நிபந்தனைகளை விதிப்பது சட்டவிரோதமானது என்றும், காவல் துறையும் மாநகராட்சி நிர்வாகமும் தலையிட்டு இதுபோன்று பாகுபாடு காட்டுபவர்கள் மீது தகுந்த நடவடிக்கை எடுக்க வேண்டும் என்றும் கோரிக்கைகள் வலுத்து வருகின்றன.

“>