தலைநகர் டெல்லியில் கடந்த ஜூலை 20-ஆம் தேதி நடைபெற்ற மாணவர்களின் போராட்டத்தின் போது ஏற்பட்ட வன்முறையில் படுகாயமடைந்த காவல்துறையினரின் குடும்பத்தினர் வெள்ளிக்கிழமை செய்தியாளர்களை  சந்தித்துத் தங்கள் வேதனையைப் பதிவு செய்துள்ளனர். இந்தச் சம்பவம் நடந்து 11 நாட்கள் கடந்துள்ள நிலையில், தங்களுக்கும் நீதி கிடைக்க வேண்டும் என்றும், நாடாளுமன்றத்தில் தங்கள் தரப்பு நியாயமும் பேசப்பட வேண்டும் என்றும் அவர்கள் கண்ணீருடன் கோரிக்கை விடுத்துள்ளனர்.

காவல்துறையைச் சேர்ந்த ஏ.எஸ்.ஐ. ஒருவரின் மனைவியான சீமா செய்தியாளர்களிடம் பேசுகையில், தனது கணவர் கடமையைச் செய்யச் சென்றபோது கூட்டத்தினரால் தாக்கப்பட்டு மருத்துவமனையில் அனுமதிக்கப்பட்டதாகத் தெரிவித்தார். போராட்டக்காரர்கள் திட்டமிட்டுக் கற்களால் தாக்குதல் நடத்தியதாகவும், முகமூடி அணிந்த சில சமூக விரோதிகள் கூட்டத்திற்குள் நுழைந்து வன்முறையில் ஈடுபட்டதாகவும் அவர் குற்றம்சாட்டினார். இதேபோல், காயமடைந்த ஏ.சி.பி.-யின் மகன் லட்சிய சிங் பிஷ்ட் மற்றும் மற்றொரு காவலரின் மகள் குஞ்சன் ஆகியோரும் தாங்கள் எதிர்கொண்ட வேதனைகளைப் பகிர்ந்து கொண்டதுடன், காவல்துறை மீதான தவறான பிம்பத்தைக் கலைத்து தங்களுக்கும் நியாயம் வழங்க வேண்டும் என உச்ச நீதிமன்றத்தை நாடியிருப்பதாகத் தெரிவித்தனர்.

இதற்கிடையே, டெல்லி காவல்துறை தரப்பில் வெளியிடப்பட்ட தகவலின்படி, சிசிடிவி காட்சிகளின் அடிப்படையில் அடையாளம் காணப்பட்ட 2,873 போராட்டக்காரர்களில் 989 பேருக்குக் கொலை, கொள்ளை உள்ளிட்ட கிரிமினல் பின்னணி இருப்பது கண்டுபிடிக்கப்பட்டுள்ளது. மறுபுறம், மாணவர் போராட்டத்தின் மீது காவல்துறை நடத்திய தடியடி மற்றும் வன்முறைச் சம்பவங்களை எதிர்த்து எதிர்க்கட்சிகள் நாடாளுமன்றத்தில் குரல் எழுப்பி வருவதுடன், அரசின் நடவடிக்கைகளுக்கு எதிராகத் தொடர் கண்டனங்களையும் தெரிவித்து வருகின்றன.