​15 வயது இளம் கிரிக்கெட் வீரர் வைபவ் சூர்யவன்ஷியின் அபாரமான பேட்டிங் திறமை, அவரை இந்திய சீனியர் அணியில் சேர்ப்பது குறித்த பெரிய விவாதத்தை ஏற்படுத்தியுள்ளது. 19 வயதுக்குட்பட்டோருக்கான இந்திய அணி மற்றும் ஐபிஎல் தொடர்களில் தனது திறமையை ஏற்கனவே நிரூபித்துள்ள இவரை, உடனடியாக இந்திய அணிக்குள் கொண்டு வர வேண்டும் என்று பலரும் கோரிக்கை விடுத்து வருகின்றனர்.

இருப்பினும், அவர் இன்னும் சில காலம் காத்திருக்க வேண்டும் என்றும், அவரை வளர்த்தெடுக்கும் முறை நிதானமாக இருக்க வேண்டும் என்றும் சில முன்னாள் வீரர்கள் கருத்து தெரிவித்துள்ளனர். ​இந்நிலையில், ராஜஸ்தான் ராயல்ஸ் அணியின் முன்னாள் கிரிக்கெட் இயக்குனர் ஜுபின் பருச்சா இது குறித்து ஒரு முக்கிய கருத்தைப் பகிர்ந்துள்ளார். சச்சின் டெண்டுல்கர் தனது 16-வது வயதில் இந்திய அணியில் அறிமுகப்படுத்தப்பட்டது போல, வைபவ் சூர்யவன்ஷிக்கும் டெஸ்ட் போட்டிகளில் வாய்ப்பு வழங்கப்பட வேண்டும் என்று அவர் கூறியுள்ளார்.

ரன் குவிப்பு மற்றும் ஸ்ட்ரைக் ரேட் என அனைத்து அளவீடுகளிலும் அவர் மற்றவர்களை விட முன்னிலையில் இருப்பதாகவும், தொழில்நுட்ப ரீதியாக அவர் மிகச் சிறந்த பேட்ஸ்மேனாகத் திகழ்வதாகவும் பருச்சா பாராட்டியுள்ளார். மேலும், அவர் ஒரு தொடக்க வீரராக இல்லாமல், மிடில் ஆர்டரில் களம் இறங்குவதே அணிக்கு அதிக பலன் தரும் என்றும் அவர் குறிப்பிட்டுள்ளார்.