கர்நாடகத்தில் நடிகர் கமல்ஹாசன் நடித்துள்ள “தக் லைஃப்” திரைப்படத்தின் பேனர்கள் கிழிக்கப்பட்ட சம்பவம் பரபரப்பை ஏற்படுத்தியுள்ளது.

இந்த படம், ஜூன் 5 ஆம் தேதி வெளியாக உள்ள நிலையில், புரமோஷன் பணிகள் முழு வீச்சில் நடைபெற்று வருகிறது. ஆனால் தற்போது உருவாகியுள்ள இந்த புதிய சர்ச்சை படக்குழுவுக்கு பெரும் அதிர்ச்சியை ஏற்படுத்தியுள்ளது.

இது குறித்து காரணமாகக் கூறப்படுவது, அண்மையில் நடைபெற்ற இசை வெளியீட்டு விழாவில் நடிகர் கமல்ஹாசன் கூறிய ஒரு கருத்து தான். அந்த விழாவில் கலந்து கொண்ட சிவராஜ்குமாருக்கு நன்றி தெரிவிக்கும்போது, “சிவராஜ்குமார் குடும்பம் என் குடும்பம் தான்… தமிழிலிருந்து வந்ததுதான் கன்னடம்” என அவர் தெரிவித்தார். இந்த பேச்சு கர்நாடகத்தில் பல்வேறு கன்னட அமைப்புகளின் கடும் எதிர்ப்பை தூண்டியுள்ளது.

இதனை தொடர்ந்து, கர்நாடகாவின் சில பகுதிகளில் “தக் லைஃப்” பட பேனர்களை கிழிக்கும் நடவடிக்கைகள் நடைபெற்றுள்ளன. மேலும், கமல்ஹாசன் தனது கருத்துக்கு மன்னிப்புக் கேட்க வேண்டும் என வலியுறுத்தி, சிலர் ஆர்ப்பாட்டங்களும் நடத்தி வருகின்றனர். சமூக வலைதளங்களிலும் இந்த விவகாரம் குறித்து பரபரப்பு உருவாகியுள்ளது.

இந்த நேரத்தில், இன்னும் 8 நாட்களில் படம் திரைக்கு வரவுள்ள நிலையில், இது படத்திற்கான பாக்ஸ்ஆஃபிஸ் வருகையிலும் தாக்கம் ஏற்படுத்தும் என சிலரும் கருத்து தெரிவிக்கின்றனர்.

ரசிகர்கள் மத்தியில் எதிர்பார்ப்பை உருவாக்கியுள்ள இப்படம், இச்சமய சர்ச்சையால் சின்ன குழப்ப நிலையை சந்திக்கிறது. இருப்பினும், இப்படம் அமைதியாக திரைக்கு வர வேண்டும் என ரசிகர்கள் கோரிக்கை விடுத்து வருகின்றனர்.