அரியலூர் வட்டாட்சியர் அலுவலகத்தில் கணக்கில் வராத பெரும்தொகை கைமாறுவதாக லஞ்ச ஒழிப்புத் துறையினருக்கு ரகசியத் தகவல் கிடைத்தது. இந்தத் தகவலின் அடிப்படையில், லஞ்ச ஒழிப்புப் பிரிவு போலீசார் அரியலூர் வட்டாட்சியர் அலுவலகத்திற்குள் திடீரென நுழைந்து அதிரடி சோதனையில் ஈடுபட்டனர். இந்த திடீர் சோதனையால் அங்கு பணியாற்றி வந்த அரசு ஊழியர்கள் மற்றும் அதிகாரிகள் அனைவரும் பெரும் அதிர்ச்சியடைந்தனர்.

​சோதனையின் போது, அலுவலகத்தில் இருந்த ஆவணங்கள் மற்றும் அதிகாரிகளின் சந்தேகத்திற்குரிய நடவடிக்க தீவிரமாக ஆய்வு செய்யப்பட்டன. அதில், கணக்கில் வராத ரூ.19,000 ரொக்கப் பணத்தை லஞ்ச ஒழிப்புத் துறையினர் கையும் களவுமாக பறிமுதல் செய்தனர். மேலும், அலுவலகத்தில் நடந்த பணப் பரிவர்த்தனைகள் குறித்து நடத்தப்பட்ட தீவிர விசாரணையில் பல திடுக்கிடும் தகவல்கள் வெளிவந்தன.

​குறிப்பாக, வழக்கமான ரொக்கப் பணத்திற்குப் பதிலாக, கூகுள் பே (GPay) போன்ற டிஜிட்டல் வழிமுறைகள் மூலம் பெருமளவில் லஞ்சப் பணம் கைமாறியிருப்பது சோதனையில் கண்டுபிடிக்கப்பட்டது. கணக்கில் வராத சுமார் ரூ.7.24 லட்சம் தொகையானது ஜிபே பரிவர்த்தனைகள் மூலமாகப் பெறப்பட்டிருப்பது ஆதாரங்களுடன் கண்டறியப்பட்டு, அந்தப் பரிவர்த்தனை விவரங்களும் அதிகாரிகளால் பறிமுதல் செய்யப்பட்டன.

​இந்தச் சட்டவிரோதச் செயல்கள் தொடர்பாக, அரியலூர் வட்டாட்சியர் தேவகி உட்பட மொத்தம் 5 பேர் மீது லஞ்ச ஒழிப்புத் துறையினர் வழக்குப் பதிவு செய்து தீவிர விசாரணை மேற்கொண்டு வருகின்றனர். அரசு அலுவலகத்தில் டிஜிட்டல் முறையில் லஞ்சப் பணம் பெறப்பட்டு மாட்டியிருக்கும் இந்தச் சம்பவம், அரியலூர் மாவட்டத்தில் பெரும் பரபரப்பையும் அதிர்ச்சியையும் ஏற்படுத்தியுள்ளது.