இன்றைய காலகட்டத்தில் பெருநகரங்களின் போக்குவரத்து நெரிசலைக் குறைக்கும் மிக முக்கியமான அங்கமாக மெட்ரோ ரயில்கள் விளங்குகின்றன. ஆனால், உலகின் மிக முதல் மெட்ரோ ரயில் பாதை எப்போது, எங்கு தொடங்கப்பட்டது என்ற வரலாறு மிகவும் சுவாரசியமானது. சுமார் 160 ஆண்டுகளுக்கு முன்பே, அதாவது 1863-ஆம் ஆண்டு ஜனவரி 10 அன்று உலகின் முதல் மெட்ரோ ரயில் சேவை இங்கிலாந்தின் லண்டன் நகரில் அதிகாரப்பூர்வமாகத் தொடங்கப்பட்டது.

‘மெட்ரோபாலிட்டன் ரயில்வே’ என்ற பெயரில் தொடங்கப்பட்ட இந்த ரயில் சேவை, லண்டனின் பேடிங்டன்  மற்றும் ஃபர்ரிங்டன்   ஆகிய இடங்களுக்கு இடையே இயக்கப்பட்டது. தொடக்கத்தில் நீராவியால் இயங்கும் இன்ஜின்கள் மூலம் இயக்கப்பட்ட இந்த ரயிலில் பயணம் செய்ய முதல் நாளிலேயே சுமார் 30,000-க்கும் மேற்பட்ட பயணிகள் ஆர்வம் காட்டினர். சுரங்கப் பாதைக்குள் புகை மூட்டம் அதிகமாக இருந்தபோதிலும், இந்த வடிவமைப்பு நகர்ப்புற போக்குவரத்தில் ஒரு மிகப்பெரிய புரட்சியை ஏற்படுத்தியது.

காலப்போக்கில் நீராவி இன்ஜின்களுக்குப் பதிலாக மின்சாரத்தில் இயங்கும் ரயில்கள் அறிமுகப்படுத்தப்பட்டு, ‘லண்டன் அண்டர்கிரவுண்ட்’  அல்லது உள்ளூர் மக்களால் அன்போடு ‘டியூப்’  என்று அழைக்கப்படும் நிலத்தடி ரயில் அமைப்பாக உருவெடுத்தது. இன்று லண்டன் நகரின் மூலை முடுக்குகளையெல்லாம் இணைக்கும் வகையில் 11 வழிகளுடன்   சுமார் 400 கிலோமீட்டருக்கும் அதிகமான நீளத்திற்குப் பரந்து விரிந்து செயல்பட்டு வருகிறது.

160 ஆண்டுகளைக் கடந்த போதிலும், தற்போதும் உலகின் பழமையான மற்றும் மிகப்பெரிய மெட்ரோ ரயில் நெட்வொர்க்குகளில் ஒன்றாக லண்டன் அண்டர்கிரவுண்ட் திகழ்கிறது. உலகளவில் சென்னை, டெல்லி, பாரிஸ், நியூயார்க் போன்ற பல முன்னணி நகரங்களில் இன்று வெற்றிகரமாக இயங்கி வரும் மெட்ரோ இரயில் அமைப்புகளுக்கெல்லாம் இந்த லண்டன் மெட்ரோதான் முன்னோடியாக அமைந்தது என்பதில் மாற்றுக் கருத்தில்லை.