₹14,000 மாத சம்பளம் வாங்கும் ரயில்வே ஊழியர் ஒருவர் வெளியிட்ட உருக்கமான வீடியோ ஒன்று தற்போது இன்ஸ்டாகிராம் பக்கங்களில் தீயாய் பரவி, ஒட்டுமொத்த சமூக வலைதளங்களையும் உலுக்கி வருகிறது. ஏசி பெட்டிகளில் பயணிக்கும் பயணிகள் செய்யும் ஒரு சில பொறுப்பற்ற காரியங்கள், எப்படி ஒரு ஏழைத் தொழிலாளியின் வயிற்றிலடிக்கிறது என்பதை இந்த வீடியோ வெளிச்சத்திற்கு கொண்டு வந்துள்ளது.
ரயில்வேயில் உள்ள ஏசி பெட்டிகளில் (AC Coaches) பயணிக்கும் பயணிகளுக்கு பெட்ஷீட், போர்வை, தலையணை உறை, துண்டு போன்ற படுக்கை வசதிகளை வழங்குவதும், பயணம் முடிந்த பிறகு அவற்றை மீண்டும் சேகரிப்பதுமே இவரது பணியாகும். ஆனால், சில பயணிகள் இறங்கும்போது இந்த பொருட்களை தங்களது பைகளுள் திருட்டுத்தனமாக எடுத்துச் சென்று விடுகின்றனர்.
இப்படி காணாமல் போகும் பொருட்களுக்கான இழப்புத் தொகையை, ரயில்வே நிர்வாகம் இந்த ஊழியர்களின் சம்பளத்திலிருந்து நேரடியாகப் பிடித்தம் செய்கிறது. இந்த மாதத்தில் மட்டும் தமக்கு ₹5,000 சம்பளப் பிடித்தம் செய்யப்பட்டுள்ளதாக அந்த ஊழியர் கண்ணீருடன் வேதனையை பகிர்ந்துள்ளார்.
தகவல் அறியும் உரிமை சட்டத்தின் (RTI) படி, கடந்த சில ஆண்டுகளில் மட்டும் இந்திய ரயில்வேயில் லட்சக்கணக்கான பெட்ஷீட்கள், போர்வைகள், தலையணைகள், துண்டுகள் திருடப்பட்டதும், இதனால் ரயில்வேக்கு பல கோடிக்கணக்கான ரூபாய் இழப்பு ஏற்பட்டுள்ளதும் வெளிச்சத்திற்கு வந்துள்ளது.
நாம் செய்யும் இந்த சிறு திருட்டு, ஒரு ஏழை ஊழியரின் ஒட்டுமொத்த குடும்பத்தின் மாத பட்ஜெட்டையே காலி செய்கிறது என்ற உண்மை பலரையும் அதிர்ச்சியடைய வைத்துள்ளது. பொதுச் சொத்துக்களைப் பாதுகாப்பதோடு மட்டுமல்லாமல், சக மனிதர்களின் மீதும் பயணிகள் பொறுப்புடன் நடந்து கொள்ள வேண்டும் என்ற விவாதத்தை இந்த வீடியோ மீண்டும் எழுப்பியுள்ளது.
