பிரேசிலில் உள்ள ஒரு  பகுதியில் உள்ள ஒரு குடியிருப்பு வளாக ஜிம்மில், உடற்பயிற்சி செய்து கொண்டிருந்த பெண்ணிடம் நபர் ஒருவர் பாலியல் அத்துமீறலில் ஈடுபட்ட சம்பவம் பெரும் பரபரப்பை ஏற்படுத்தியுள்ளது. ஞாயிற்றுக்கிழமை காலை நடைபெற்ற இச்சம்பவம், பாதிக்கப்பட்ட பெண் தனது உடற்பயிற்சி வீடியோவைப் பரிசீலித்த போதே வெளிச்சத்திற்கு வந்துள்ளது.

பாதிக்கப்பட்ட பெண் ஜிம்மில் உடற்பயிற்சி செய்துகொண்டிருந்தபோது, அங்கு வந்த நபர் ஒருவர் அப்பெண்ணை நோட்டமிட்டவாறே ஆபாசமான முறையில் நடந்துகொண்டுள்ளார். உடற்பயிற்சி செய்யும் தீவிரத்தில் இருந்ததால், அந்த நபரின் செயலை அந்தப் பெண் உடனடியாகக் கவனிக்கவில்லை. இருப்பினும், தனது உடற்பயிற்சி முறையைப் பார்ப்பதற்காகத் தனது மொபைல் போனில் பதிவு செய்யப்பட்ட வீடியோவை மீண்டும் ஆய்வு செய்தபோது, அந்த நபர் பின்புறத்தில் நின்றுகொண்டு அருவருக்கத்தக்க வகையில் சில்மிஷத்தில் ஈடுபட்டது தெரியவந்து அதிர்ச்சியடைந்தார்.

இச்சம்பவம் குறித்து அந்தப் பெண் உடனடியாகக் காவல்துறையில் புகார் அளித்தார். புகாரின் பேரில் போலிஸார் சம்பவ இடத்திற்கு விரைந்து வந்தனர். ஆனால், அதற்குள்ளாகவே அந்தச் சந்தேக நபர் அங்கிருந்து தப்பிச் சென்றுவிட்டார். தற்போது இந்த வழக்கைக் கையிலெடுத்துள்ள சிவில் பொலிஸார், பெண் பதிவு செய்த வீடியோ ஆதாரத்தைக் கொண்டு அந்த நபரை அடையாளம் காணும் பணியில் தீவிரமாக ஈடுபட்டுள்ளனர்.

குற்றவாளி அடையாளம் காணப்பட்டால், அவர் மீது கடுமையான பாலியல் துன்புறுத்தல் சட்டங்களின் கீழ் வழக்குப் பதிவு செய்யப்படும் எனத் தெரிவிக்கப்பட்டுள்ளது. அதேவேளையில், இச்சம்பவம் குறித்து அந்த குடியிருப்பு நிர்வாகம் இதுவரை அதிகாரப்பூர்வ விளக்கம் எதுவும் அளிக்கவில்லை. தலைமறைவான நபரைப் பிடிக்க காவல்துறையினர் தீவிர விசாரணை மேற்கொண்டு வருகின்றனர்.