மேற்கு வங்காள மாநிலத்தின் முன்னாள் முதல்வரும், திரிணாமுல் காங்கிரஸ்  கட்சியின் தலைவருமான மம்தா பானர்ஜி, கொல்கத்தாவில் உள்ள தனது காளிகாட் இல்லத்தின் வெளிப்பகுதியில் கட்சித் தொண்டர் ஒருவரை கோபத்தில் அறைந்த சம்பவம் பெரும் பரபரப்பை ஏற்படுத்தியுள்ளது. கொல்கத்தாவில் நடைபெற்ற அக்கட்சியின் மாணவர் மற்றும் இளைஞர் அணி பேரணியில் ஏற்பட்ட கடுமையான மோதல் மற்றும் குழப்பமான சூழ்நிலையைத் தொடர்ந்து இந்த அதிரடி சம்பவம் அரங்கேறியுள்ளது.

பேரணியின் போது தங்களது கட்சியின் தலைவர்கள் மற்றும் தொண்டர்கள் பலர் காயமடைந்ததால், அவர்களை மருத்துவமனைக்கு அழைத்துச் செல்வதற்காக வாகனங்களை ஏற்பாடு செய்யும் பணியில் மம்தா பானர்ஜி நேரடியாக ஈடுபட்டிருந்தார். அப்போது தனது வீட்டின் முன்பாக வாகனங்கள் எளிதாகச் சென்று வருவதற்கு ஏதுவாக, அங்கு கூடியிருந்த கூட்டத்தை விலகிச் செல்லுமாறு மம்தா பானர்ஜி உத்தரவிட்டு வழிநடத்தினார்.

அந்த இக்கட்டான நெரிசலில், அவருக்குப் பின்னால் நின்று கொண்டு அவருக்குப் பாதுகாப்பு வளையம் அமைக்க முயன்ற ஒரு கட்சித் தொண்டரின் மீது மம்தா பானர்ஜி திடீரென தனது பொறுமையை இழந்து, அவரது கன்னத்தில் ஓங்கி அறைந்தார். இந்த அதிர்ச்சிகரமான காட்சி அங்கிருந்த ஊடகக் கேமராக்களில் பதிவாகி, தற்போது சமூக வலைத்தளங்களில் வைரலாகி நாடு முழுவதும் பெரும் பேசுபொருளாக மாறியுள்ளது. எனினும், இந்தச் சம்பவம் குறித்து திரிணாமுல் காங்கிரஸ் கட்சியின் சார்பில் இதுவரை அதிகாரப்பூர்வ விளக்கம் எதுவும் அளிக்கப்படவில்லை.