அயர்லாந்து மற்றும் இங்கிலாந்துக்கு டி20 தொடர்களில் விளையாடச் சென்ற ஸ்ரேயாஸ் ஐயர் தலைமையிலான இந்திய கிரிக்கெட் அணி, ஒரு போட்டியில் கூட வெற்றி பெற முடியாமல் ஒட்டுமொத்தமாகத் தொடரை இழந்து மிக மோசமான படுதோல்வியைச் சந்தித்துள்ளது.

இந்த மோசமான செயல்பாட்டின் காரணமாக, ஸ்ரேயாஸ் ஐயரின் கேப்டன்சி பதவி கேள்விக்குறியாகி இருப்பதாகப் பரவலான விமர்சனங்கள் எழுந்துள்ளன. இந்நிலையில், கடந்த ஆண்டு பிசிசிஐ  அமைப்பால் இந்திய அணியின் உதவி பயிற்சியாளர் பதவியிலிருந்து நீக்கப்பட்ட அபிஷேக் நாயர், இந்த விவகாரம் குறித்து மனம் திறந்துள்ளார்.

அதோடு ஸ்ரேயாஸ் ஐயர் கேப்டனாகச் செயல்படும் முதல் சர்வதேசத் தொடர் இது என்பதோடு, அவரே நீண்ட இடைவெளிக்குப் பிறகு டி20 அணிக்குத் திரும்பியுள்ளார் என்பதால், இந்தத் தோல்விகளை மட்டும் வைத்து அவரது கேப்டன்சி எதிர்காலத்தை ஆபத்தில் தள்ளுவது மிகவும் கடுமையான முடிவாக இருக்கும் என்று பிசிசிஐ-க்கு அவர் எச்சரிக்கை விடுத்துள்ளார்.

மேலும், ஒரு அணி தொடர்ச்சியாகத் தோல்விகளைச் சந்திக்கும் போது அணியில் அடுத்தடுத்து வீரர்களை மாற்றுவது போன்ற ‘குழப்பங்களை’ ஏற்படுத்தாமல், அவர்களுக்கு ‘சரியான வழிகாட்டுதலை’ உருவாக்க வேண்டும் என்று கவுதம் கம்பீர் தலைமையிலான தற்போதைய பயிற்சியாளர் குழுவிற்கும் தேர்வுக் குழுவிற்கும் நாயர் அறிவுறுத்தியுள்ளார்.

இந்நிலையில் இங்கிலாந்து ஆடுகளங்களின் தன்மைக்கு இந்திய வீரர்கள் சரியாகத் தங்களை மாற்றிக்கொள்ளத் தவறியதே இந்தத் தோல்விக்கு முக்கியக் காரணம் என்று சுட்டிக்காட்டிய அவர், தற்போதைய பின்னடைவைக் கண்டு வீரர்களை அணியிலிருந்து தூக்கி எறிவதற்குப் பதிலாக, அவர்களிடம் என்ன எதிர்பார்க்கப்படுகிறது மற்றும் எந்தெந்தப் பகுதிகளில் முன்னேற வேண்டும் என்பதைத் தெளிவாகத் தொடர்பு கொண்டு அவர்களின் திறனை மேம்படுத்த ஆதரவு அளிக்க வேண்டும் என்று வலியுறுத்தினார்.