இயக்குனர் ராம் எதார்த்தமான படங்கள் எடுப்பதில் வல்லமை பெற்றவர். அவர் இயக்கிய, கற்றது தமிழ், தங்க மீன்கள், பேரன்பு, தரமணி உள்ளிட்ட படங்கள் எதார்த்தமான கதை களத்தால் மக்கள் மனதில் நீங்கா இடம் பிடித்த படங்கள் ஆகும். இந்த நிலையில் சமீபத்தில் அவர் இயக்கிய “பறந்து போ” என்ற திரைப்படம் திரையரங்குகளில் வெளியானது.
இந்த படத்தில் மிர்ச்சி சிவா கதாநாயகனாகவும், அஞ்சலி, கிரேஸ் ஆண்டனி, அஜீ வர்கீஸ் ஆகியோர் முன்னணி கதா பாத்திரங்களில் நடித்துள்ளனர். இந்த படத்தின் முக்கிய கதைகளமாவது பணத்தின் மீது அதிக மோகம் கொண்ட பிடிவாதமான சிறுவன் பண ஆசையால் அவனும், அவனது தந்தையும் சேர்ந்து நகர வாழ்க்கையில் இருந்து விலகி பயணம் மேற்கொள்வது குறித்த ரோடு டிராமவாக இந்த திரைப்படம் உருவாகியுள்ளது.
இந்த படம் திரையில் வெளியாகி மக்கள் மத்தியில் நல்ல வரவேற்பை பெற்றுள்ளது. இந்த படம் குறித்து இயக்குனர் அட்லி வீடியோ வெளியிட்டுள்ளார். அந்த வீடியோவில் அவர் கூறியதாவது நான் சமீபத்தில் பறந்து போ திரைப்படம் பார்த்தேன். இந்த திரைப்படம் மனதிற்கு மிகவும் நெருக்கமாக இருந்தது.
ஒரு அப்பாவிற்கும் மகனுக்கும் இடையே இருக்கும் அழகான உறவை இயக்குனர் ராம் படத்தில் மிகத் தெளிவாக காட்டியுள்ளார். மேலும் படத்தில் சிவா மற்றும் அஞ்சலியின் கதாபாத்திரம் பார்ப்பதற்கு மிகவும் பிடித்திருந்தது.
இந்த படத்தில் இடம்பெற்ற பாடல்கள் அனைத்துமே கேட்பதற்கு நன்றாக இருந்தது. எனவே படத்தை இயக்கிய இயக்குனர் ராம் அண்ணா அவர்களுக்கு வாழ்த்துக்களை தெரிவித்திருந்தார்.
