ஆஸ்திரேலியாவின் மேற்கு கடலோரப் பகுதியில் உள்ள லெஷெனால்ட் எஸ்ட்யூரி கடற்பகுதியில் பதிவான அரிய சம்பவம் ஒன்று உலகம் முழுவதும் நெகிழ்ச்சியை ஏற்படுத்தியுள்ளது. ‘ஃப்ராஜைல்’ (Fragile) என்று அழைக்கப்படும் பெண் பாட்டில்நோஸ் டால்பின், உயிரிழந்த தனது குட்டியை முதுகில் சுமந்தபடி தொடர்ந்து ஆறு நாட்கள் கடலில் நீந்திய காட்சி ட்ரோன் கேமராவில் பதிவாகியுள்ளது. இந்த வீடியோ சமூக வலைதளங்களில் வேகமாக பரவி, பலரையும் உணர்ச்சிவசப்பட வைத்துள்ளது.
ஆய்வாளர்கள் தெரிவித்த தகவலின்படி, இந்த டால்பினின் குட்டி பிறந்து இரண்டு வாரங்களே ஆன நிலையில் உயிரிழந்துள்ளது. இருப்பினும், தனது குட்டியை பிரிந்து செல்ல மறுத்த தாய் டால்பின், அதை முதுகில் தாங்கியபடி கடலில் தொடர்ந்து நீந்திக் கொண்டிருந்தது. இந்த அபூர்வமான நடத்தை, கடல் உயிரினங்களின் இயல்பான தாய்மை உணர்வை வெளிப்படுத்துவதாக ஆராய்ச்சியாளர்கள் கூறுகின்றனர்.
View this post on Instagram
இந்த சம்பவம் இந்தியப் பெருங்கடலுடன் இணைந்த மேற்கு ஆஸ்திரேலியாவின் லெஷெனால்ட் எஸ்ட்யூரி பகுதியில் ஆய்வுப் பணிகளில் ஈடுபட்டிருந்த ஆராய்ச்சியாளர்களால் பதிவு செய்யப்பட்டது. ட்ரோன் மூலம் எடுக்கப்பட்ட காட்சிகள் சமூக வலைதளங்களில் வெளியாகியதும், உலகம் முழுவதும் லட்சக்கணக்கானோர் அந்த வீடியோவை பகிர்ந்து வருகின்றனர். பலரும் இந்த காட்சியை இயற்கையின் ஆழமான பாசத்தை வெளிப்படுத்தும் தருணமாகக் குறிப்பிட்டு வருகின்றனர்.
உயிரிழந்த குட்டியைக் கூட கைவிடாமல் தொடர்ந்து சுமந்து சென்ற தாய் டால்பினின் இந்த செயல், விலங்குகளிடமும் தாய்மை உணர்வு எவ்வளவு வலிமையானது என்பதை மீண்டும் ஒருமுறை நினைவூட்டியுள்ளது. இந்த நிகழ்வு குறித்து சமூக வலைதளங்களில் பலரும் நெகிழ்ச்சியுடன் கருத்துகளை பகிர்ந்து வரும் நிலையில், இந்த வீடியோ உலகம் முழுவதும் பரவலாக பேசப்படும் நிகழ்வாக மாறியுள்ளது.
