திருமணம் செய்யும் முன் ஜோடிகள் மருத்துவப் பரிசோதனை மேற்கொள்ள வேண்டும் என்பதை கட்டாயமாக்க வேண்டும் என்று அரசுக்கு உத்தரவு வழங்கக் கோரி பொதுநல மனு ஒன்று சென்னை உயர்நீதிமன்ற மதுரை கிளையில் தாக்கல் செய்யப்பட்டது.
இந்த மனுவில், “பல தம்பதிகள் திருமணத்திற்கு பிறகு மருத்துவ சிக்கல்கள், பாரம்பரிய ரீதியான நோய்கள் போன்ற பிரச்சனைகளால் பாதிக்கப்படுகின்றனர். இதைத் தவிர்க்க, மருத்துவ பரிசோதனை கட்டாயம் என்பதை அரசு சட்டமாக்க வேண்டும். அதற்கு நீதிமன்றம் உத்தரவு வழங்க வேண்டும்” என்று கோரப்பட்டது.
இந்த மனுவை நீதிபதிகள் விசாரணைக்கு எடுத்துக்கொண்டபோது, இது போன்ற சட்டம்சார்ந்த முடிவுகளை எடுப்பது அரசுக்கும், நாடாளுமன்றத்துக்கும் மட்டுமே உரிமை எனக் கூறினர். நீதிமன்றம் அரசுக்கு சட்டம் இயற்ற உத்தரவு வழங்கும் நிலைமை இல்லை என்பதையும், இது சட்டப்பேரவை விவகாரம் என்பதையும் எடுத்துக்காட்டினர்.
இதன் பின்னர், “இந்த கோரிக்கையை சட்டமாக மாற்ற வேண்டுமென்றால், அதற்கான வழிமுறை நாடாளுமன்றத்தில் தான் தேடப்பட வேண்டும்” எனக் குறிப்பிட்ட நீதிபதிகள், இந்த வழக்கை தள்ளுபடி செய்தனர்.
