“மும்பையில் நடைபெற்ற செயற்கை நுண்ணறிவு (AI) அடிப்படையிலான உலகளாவிய விளையாட்டுத் தள அறிமுக நிகழ்ச்சியில் சிறப்பு விருந்தினராகக் கலந்துகொண்ட தென்னாப்பிரிக்க கிரிக்கெட் அணியின் முன்னாள் அதிரடி ஜாம்பவான் ஏபி டி வில்லியர்ஸ், இந்திய அணியின் 15 வயது இளம் நட்சத்திர வீரரான வைபவ் சூர்யவன்ஷியின் எதிர்கால கிரிக்கெட் வாழ்க்கை குறித்துப் பல முக்கியக் கருத்துகளைப் பகிர்ந்துள்ளார்.

சூர்யவன்ஷி அசாத்தியமான திறமைகளைக் கொண்ட ஒரு அற்புதமான வீரர் என்று மனதாரப் பாராட்டிய டி வில்லியர்ஸ், அவர் நீண்ட வடிவ கிரிக்கெட்டான டெஸ்ட் போட்டிகளில் விளையாடுவாரா என்ற கேள்விக்குத் தம்மால் இப்பொழுதே உறுதியாகப் பதிலளிக்க முடியாது என்று ஓப்பனாகத் தெரிவித்துள்ளார்.

டெஸ்ட் கிரிக்கெட்டில் விளையாடுவதற்கான தகுதியும் திறமையும் அவரிடம் நிச்சயம் இருக்கிறது என்றும், அவர் விரும்பினால் அதில் சாதிக்க முடியும் என்றும் குறிப்பிட்ட அவர், ஆனால் தற்போதைய டி20 யுகத்தில் அவருக்கு டெஸ்ட் கிரிக்கெட்டில் உண்மையான ஆர்வம் இருக்கிறதா என்பதுதான் இங்கு மிக முக்கியக் கேள்வி எனச் சுட்டிக்காட்டியுள்ளார்.

சூர்யவன்ஷி போன்ற இளம் திறமைகள் டெஸ்ட் போட்டிகளில் விளையாட முயற்சி செய்ய வேண்டும் என்பதே தனது தனிப்பட்ட விருப்பம் என்றாலும், தற்போதைய சூழலில் அதற்கான வாய்ப்பு மிகக் குறைவாகவே இருப்பதாகத் தோன்றுவதாகவும், இதற்குரிய பதவியைக் காலம்தான் சொல்லும் என்றும் அவர் யதார்த்தமாகப் பேசியுள்ளார்.

உலகக் கிரிக்கெட்டின் ‘மிஸ்டர் 360’ என்று அழைக்கப்படும் டி வில்லியர்ஸின் இந்த  விவாதம், இந்திய கிரிக்கெட் வட்டாரத்திலும் சமூக வலைதளங்களிலும் தற்பொழுது  பரபரப்பை ஏற்படுத்தியுள்ளது.