தெற்கு மும்பையின் நாக்படா பகுதியில் உள்ள டிம்டிம்கர் சாலையில் அமைந்துள்ள ஒரு கட்டிடத்தில், தண்ணீர் தொட்டியை சுத்தம் செய்த ஐந்து தொழிலாளர்கள் மூச்சுத்திணறி உயிரிழந்த சம்பவம் பெரும் சோகத்தை ஏற்படுத்தியுள்ளது. பிஸ்மில்லா ஸ்பேஸ் கட்டிடத்தில் இன்று மதியம் இந்த துயர சம்பவம் நடைபெற்றது. தொழிலாளர்கள் பணியில் ஈடுபட்டிருந்தபோது, திடீரென அனைவரும் மயங்கி விழுந்ததாக கூறப்படுகிறது.
சம்பவம் நடந்தவுடன் அங்கு இருந்த மற்ற தொழிலாளர்கள் விரைந்து உதவ முயன்றனர். ஆனால் அவர்கள் அனைவரும் தண்ணீர் தொட்டிக்குள் இருந்து வெளியே வர முடியாத நிலை ஏற்பட்டது. இதையடுத்து தீயணைப்பு மற்றும் மீட்புப்படையினருக்கு தகவல் தெரிவிக்கப்பட்டது. சம்பவ இடத்திற்கு விரைந்து வந்த தீயணைப்பு படையினர் அவர்களை மீட்டு, உடனடியாக அரசு ஜேஜே மருத்துவமனைக்கு கொண்டு சென்றனர்.
மருத்துவர்கள் பரிசோதனை செய்தபோது, தொழிலாளர்கள் அனைவரும் ஏற்கெனவே உயிரிழந்துவிட்டதாக தெரிவித்தனர். இந்த சம்பவம் அவர்களின் குடும்பத்தினரையும் தொழிலாளர் சமூகத்தையும் மிகுந்த துயரத்தில் ஆழ்த்தியுள்ளது. சுத்தம் செய்யும் பணிகளில் பாதுகாப்பு உபகரணங்கள் வழங்கப்பட்டுள்ளதா, தொழிலாளர்கள் எந்த விதமான வாயு தாக்கத்தால் பாதிக்கப்பட்டனர் என்பதற்கான உறுதிப்படுத்தல் இதுவரை கிடைக்கவில்லை.
இந்த துயர சம்பவம் குறித்து போலீசார் வழக்குப்பதிவு செய்து விசாரணை நடத்தி வருகின்றனர். தொழிலாளர்களின் மரணத்திற்கு பொறுப்பானவர்கள் யார், பாதுகாப்பு அம்சங்கள் ஏன் மீறப்பட்டன என்பதற்கான தெளிவான பதில் இன்னும் கிடைக்கவில்லை. சமூக ஆர்வலர்கள் மற்றும் தொழிலாளர் சங்கங்கள் இந்த விபத்தில் காரணமானவர்கள் மீது கடுமையான நடவடிக்கை எடுக்க வேண்டும் எனக் கோரிக்கை விடுத்துள்ளனர்.
