தமிழகத்தில் இன்று வெளியாகியுள்ள பிளஸ்-2 தேர்வு முடிவுகளில், அரியலூர் மாவட்டத்தைச் சேர்ந்த மாணவி ரிக்ஷிதா செய்துள்ள சாதனை ஒட்டுமொத்த மாநிலத்தையுமே திரும்பிப் பார்க்க வைத்துள்ளது.
அரியலூர் தனியார் பள்ளியில் பயின்ற இவர், 600-க்கு 598 மதிப்பெண்கள் குவித்து மாநில அளவில் முதலிடத்தைப் பிடித்து அசத்தியுள்ளார். குறிப்பாக இயற்பியல், வேதியியல், கணிதம் மற்றும் உயிரியல் என நான்கு முக்கிய பாடங்களிலும் 100-க்கு 100 எடுத்து ‘சென்டம்’ மழை பொழிந்துள்ள ரிக்ஷிதா, தமிழ் மற்றும் ஆங்கிலத்தில் தலா 99 மதிப்பெண்கள் பெற்று மயிரிழையில் முழு மதிப்பெண்ணைத் தவறவிட்டுள்ளார்.
“அரியலூர் என்றாலே மருத்துவ கனவு தான்” என்ற பிம்பத்திற்கு வலுசேர்க்கும் வகையில், உயிரியல் பாடத்திலும் சதம் அடித்து ரிக்ஷிதா படைத்துள்ள இந்த இமாலய சாதனை, அவரது குடும்பத்தினரை ஆனந்தக் கண்ணீரில் நனைய வைத்துள்ளது. தற்போது ரிக்ஷிதாவின் வீடே திருவிழாக் கோலம் பூண்டுள்ள நிலையில், சமூக வலைதளங்களில் இவரது மார்க் லிஸ்ட் தான் இப்போது “டாப் ட்ரெண்டிங்”!
