உலகெங்கிலும் உள்ள குறிப்பிட்ட சில ஐபோன் பயனர்களைக் குறிவைத்து ‘மெர்சினரி ஸ்பைவேர்’ (Mercenary Spyware) தாக்குதல்கள் நடத்தப்பட வாய்ப்புள்ளதாக ஆப்பிள் நிறுவனம் எச்சரித்துள்ளது. சாதாரண மால்வேர்களை விட மிக ஆபத்தான இந்த ஹேக்கிங் முயற்சியால், பயனர்களின் தனிப்பட்ட தகவல்கள் திருடப்படும் அபாயம் உள்ளதால் ஒட்டுமொத்த ஐபோன் பயனர்கள் மத்தியிலும் பெரும் பரபரப்பும் பதற்றமும் நிலவி வருகிறது.
இந்தத் தாக்குதல் குறித்த எச்சரிக்கை அறிவிப்பைப் பெற்ற பயனர்கள், எவ்விதத் தாமதமும் இன்றி உடனடியாகத் தங்களது ஐபோனில் ‘லாக்டவுன் மோட்’ (Lockdown Mode) வசதியை ஆன் செய்யுமாறு ஆப்பிள் அறிவுறுத்தியுள்ளது. இந்த சிறப்புப் பாதுகாப்பு வசதியை ஆன் செய்வதன் மூலம் போனின் பாதுகாப்பு அடுக்குகள் பலப்படுத்தப்பட்டு, ஹேக்கர்களின் ஊடுருவல் முயற்சி முற்றிலுமாக முறியடிக்கப்படும்.
நேரடி எச்சரிக்கை வராத மற்ற பயனர்களும் அலட்சியமாக இருக்காமல், தங்களது ஐபோன்களை உடனடியாகப் புதிய மென்பொருள் பதிப்பிற்கு (iOS Update) அப்டேட் செய்ய வேண்டும். அத்துடன், தங்கள் ஆப்பிள் ஐடி கணக்கின் பாதுகாப்பை மேலும் உறுதி செய்ய ‘டூ-ஃபேக்டர் ஆதென்டிகேஷன்’ (Two-Factor Authentication) வசதியை உடனடியாக ஆன் செய்து கொள்ளுமாறு கேட்டுக்கொள்ளப்பட்டுள்ளனர்.
சந்தேகத்திற்குரிய நபர்களிடமிருந்து வரும் செய்திகள் மற்றும் தேவையில்லாத இணையதள லிங்குகளைக் கிளிக் செய்வதைத் தவிர்ப்பதன் மூலம் டிஜிட்டல் ஆபத்துகளிலிருந்து எளிதாகத் தப்பிக்கலாம். ஆப்பிள் நிறுவனம் விடுத்துள்ள இந்த எச்சரிக்கையைக் கவனத்தில் கொண்டு, ஐபோன் பயனர்கள் அனைவரும் தங்களது சாதனங்களில் தேவையான தற்காப்பு நடவடிக்கைகளை உடனடியாக மேற்கொள்வதே புத்திசாலித்தனம்.
