தமிழக அரசியலில் சமீபகாலமாக மாற்று கட்சிகளைச் சேர்ந்த முக்கியப் புள்ளிகள் மற்றும் முன்னாள் அமைச்சர்கள் பலரும் தங்களது தாய் கட்சியை விட்டு விலகி, நடிகர் விஜய் தலைமையிலான தவெக (தமிழக வெற்றி கழகம்) கட்சியில் இணையப் போவதாகப் பல்வேறு வதந்திகள் காட்டுத்தீயாய் பரவி வருகின்றன. அந்த வகையில், அதிமுகவின் மிக முக்கியத் தூணாகவும், கொங்கு மண்டலத்தின் அசைக்க முடியாத சக்தியாகவும் திகழும் முன்னாள் அமைச்சர் எஸ்.பி.வேலுமணி, அதிமுகவிலிருந்து விலகி தவெக-வில் இணையப் போவதாகச் சமூக வலைத்தளங்களில் ஒரு பரபரப்புத் தகவல் வெளியாகி அரசியல் வட்டாரத்தை அதிர வைத்தது.

​இந்நிலையில், செய்தியாளர் சந்திப்பு ஒன்றில் கலந்து கொண்டுவிட்டு வெளியே வந்த எஸ்பி வேலுமணி அவர்களிடம், நிருபர் ஒருவர் “நீங்கள் தவெக-வில், அதாவது தமிழக வெற்றி கழகத்தில் இணையப் போவதாகக் கூறப்படுகிறதே, அது உண்மையா?” என்று நேரடியாகக் கேள்வி எழுப்பினார்.

இந்தக் கேள்வியைக் கேட்டு சற்றும் பதற்றமடையாத எஸ்பி வேலுமணி, முகத்தில் பெரிய புன்னகையோடு சிரித்துக் கொண்டே, “எல்லாத்தையும் நீங்களே முடிவு செஞ்சா எப்படி? ஏன், நான் அண்ணா திமுகவில் இருக்கக்கூடாதா? நீங்களாகவே ஒரு முடிவெடுத்து விடுவீர்களா?” என்று நக்கல் கலந்த பாணியில் நிருபருக்குப் பதிலளித்துவிட்டு அங்கிருந்து நகர்ந்து சென்றார். தவெக வதந்திக்குத் தனது வழக்கமான பாணியில் சிரித்துக் கொண்டே எஸ்பி வேலுமணி முற்றுப்புள்ளி வைத்துள்ள இந்த சுவாரசிய வீடியோ காட்சி, தற்போது இணையவாசிகள் மத்தியில் மரண மாஸ் ட்ரெண்டாகி வருகிறது.