ஏழை மற்றும் நடுத்தர மக்களின் வாழ்வாதாரத்தோடும், கனவுகளோடும் கலந்திருக்கும் தங்கம் விலையானது, கடந்த சில மாதங்களாகவே கண்ணிமைக்கும் நேரத்தில் ஏறுவதும் இறங்குவதுமாக இருந்து வருகிறது. அந்த வகையில், இன்று தங்கம் விலையில் யாரும் எதிர்பாராத விதமாக ஒரே நாளில் இரண்டு முறை மிகப்பெரிய மாற்றம் ஏற்பட்டு நகைப்பிரியர்களைத் தலைசுற்ற வைத்துள்ளது.

இன்று காலை வர்த்தகம் தொடங்கிய போது, தங்கம் விலை சவரனுக்கு அதிரடியாக 2,160 ரூபாய் சரிந்து, ஒரு சவரன் 1,04,240 ரூபாய்க்கு விற்பனையானது. இந்தத் திடீர் விலை சரிவைக் கண்டு மகிழ்ச்சியடைந்த மக்கள், நகைக்கடைகளுக்குச் செல்ல திட்டமிட்டிருந்த வேளையில், தங்கம் விலை மதிய நேரத்தில் மீண்டும் கிடுகிடுவென உயர்ந்து அதிர்ச்சியை ஏற்படுத்தியுள்ளது.

​காலையில் குறைந்த மகிழ்ச்சி நீடிப்பதற்குள், மதிய நேரத்தில் தங்கம் விலை சவரனுக்குப் பொத்தாம் பொதுவாக 1,360 ரூபாய் வரை அதிரடியாக உயர்ந்துள்ளது. இந்த அதிரடி மாற்றத்திற்குப் பிறகு, தற்போதைய நிலவரப்படி சென்னையில் ஒரு சவரன் தங்கம் 1,05,600 ரூபாய்க்கும், ஒரு கிராம் தங்கம் 13,200 ரூபாய்க்கும் விற்பனை செய்யப்பட்டு வருகிறது.

ஒரே நாளில் தங்கம் விலை சரிந்து, பின் மீண்டும் ராக்கெட் வேகத்தில் எகிறியிருக்கும் இந்த விசித்திரமான சம்பவம் சமூக வலைத்தளங்களில் விவாதப் பொருளாக மாறியுள்ளதுடன், “இனிமேல் தங்கம் வாங்குவது நடுத்தர மக்களுக்கு எட்டாக்கனிதானா?” என்று நெட்டிசன்களையும் ஆவேசமாகக் கேள்வி எழுப்ப வைத்துள்ளது.