தமிழக சட்டமன்றத் தேர்தல் 2026-க்கான தேதி அறிவிக்கப்பட்டுவிட்ட நிலையில், ஆளுங்கட்சியான திமுக தனது கூட்டணிக் கட்சிகளுடன் தொகுதிப் பங்கீட்டை மின்னல் வேகத்தில் முடித்து வருகிறது. ஏற்கனவே காங்கிரஸ் (28 இடங்கள்), சிபிஐ (5 இடங்கள்) உட்பட 6 கட்சிகளுடன் தொகுதிப் பங்கீடு இறுதியான நிலையில், இன்று மாலை திமுக தலைவர் மு.க. ஸ்டாலினை, விசிக தலைவர் திருமாவளவன் அண்ணா அறிவாலயத்தில் நேரில் சந்தித்துப் பேசுகிறார். கடந்த 2021 தேர்தலில் 6 தொகுதிகளில் போட்டியிட்டு 4-ல் வெற்றி பெற்ற விசிக, தற்போது தங்களுக்குக் தேர்தல் ஆணையத்தின் அங்கீகாரம் கிடைத்துள்ளதைச் சுட்டிக்காட்டி, 12 தொகுதிகள் வரை கேட்டு திமுக-வுக்கு கடும் அழுத்தம் கொடுத்து வருவதாகக் கூறப்படுகிறது.
இந்தத் தொகுதிகளின் எண்ணிக்கையில் நிலவும் இழுபறி காரணமாகவே விசிக-வுடனான ஒப்பந்தம் இன்று வரை தள்ளிப்போனது. இருப்பினும், கூட்டணியில் புதிய வரவாக தேமுதிக, மக்கள் நீதி மய்யம் போன்ற கட்சிகள் இணைந்துள்ளதால், திமுக தலைமை விசிக-வுக்கு அதிகபட்சமாக 8 தொகுதிகள் வரை ஒதுக்க முன்வந்துள்ளதாகத் தகவல்கள் கசிகின்றன. இன்று மாலை நடைபெறும் சந்திப்பின் போது இந்த ‘சீட்’ கணக்குகள் இறுதி செய்யப்பட்டு, அதிகாரப்பூர்வ ஒப்பந்தம் கையெழுத்தாகும் என எதிர்பார்க்கப்படுகிறது. விசிக தனது தனிச் சின்னமான ‘பானை’ சின்னத்திலேயே அனைத்துத் தொகுதிகளிலும் போட்டியிடும் என்பதில் திருமாவளவன் உறுதியாக இருப்பதால், இன்றைய சந்திப்பு தமிழக அரசியலில் மிகுந்த எதிர்பார்ப்பை ஏற்படுத்தியுள்ளது.
