தமிழகத்தில் சட்டம் ஒழுங்கு முற்றிலும் சீர்குலைந்துவிட்டதாகக் குற்றம் சாட்டியுள்ள தமிழிசை சௌந்தரராஜன், அடுக்கடுக்கான புகார்களை முன்வைத்துள்ளார். “நாங்குநேரி ஜாதி மோதல் கலவரம், வேங்கைவயல் குடிநீர் தொட்டி விவகாரம் மற்றும் 2 வயதுக் குழந்தைக்கு நடந்த கொடூரமான பாலியல் வன்கொடுமை எனத் தமிழகத்தில் மனதை உலுக்கும் பல சம்பவங்கள் தொடர்ச்சியாக நடந்து வருகின்றன. சமூக நீதி பேசும் சு. வெங்கடேசன் போன்றவர்கள் இதுபோன்ற விவகாரங்களில் எங்கே போனார்கள்? ஏன் மவுனமாக இருக்கிறார்கள்?” என்று அவர் காட்டமாக கேள்வி எழுப்பினார்.
​
மேலும், இதுபோன்ற நிர்வாகத் தோல்விகளையும், சட்டம் ஒழுங்கு சீர்குலைவையும் மூடி மறைக்கவே திமுக அரசு ‘இந்தி திணிப்பு’ என்ற பழைய ஆயுதத்தைக் கையில் எடுப்பதாக அவர் சாடினார். ரயில் நிலையங்களில் ஹிந்தி பெயர்கள் மாற்றப்பட்ட விவகாரத்தை திமுக அரசியல் ஆக்குவதை குறிப்பிட்ட அவர், “மக்களின் பாதுகாப்பில் கவனம் செலுத்தாத திமுக, மொழி உணர்வைத் தூண்டிவிட்டுத் திசைதிருப்பப் பார்க்கிறது” என்று குற்றம் சாட்டினார். தமிழிசையின் இந்த நேரடித் தாக்குதல் 2026 தேர்தல் நெருங்கும் வேளையில் திமுகவிற்குப் பெரும் நெருக்கடியை ஏற்படுத்தியுள்ளது.