அகில இந்திய மருத்துவ அறிவியல் கழகத்தில் நர்சிங் அலுவலர் (Nursing Officer) பணிக்கான 2,551 காலிப்பணியிடங்களை நிரப்புவதற்கான அறிவிப்பு வெளியாகியுள்ளது. இந்தியா முழுவதும் உள்ள பல்வேறு எய்ம்ஸ் கிளைகள் மற்றும் அரசு மருத்துவமனைகளில் இப்பணிகள் நிரப்பப்பட உள்ளன. தகுதியும் ஆர்வமும் உள்ள விண்ணப்பதாரர்கள், வரும் மார்ச் 16, 2026-க்குள் எய்ம்ஸ் நிறுவனத்தின் அதிகாரப்பூர்வ இணையதளமான www.aiimsexams.ac.in என்ற தளத்திற்குச் சென்று ஆன்லைனில் விண்ணப்பிக்க வேண்டும்.

இந்தப் பணிக்கு விண்ணப்பிக்க விரும்பும் விண்ணப்பதாரர்கள், அங்கீகரிக்கப்பட்ட கல்வி நிறுவனத்தில் பி.எஸ்.சி (B.Sc) நர்சிங் அல்லது டிப்ளமோ நர்சிங் (GNM) முடித்திருக்க வேண்டும். மேலும், இந்திய அல்லது மாநில நர்சிங் கவுன்சிலில் முறையாகப் பதிவு செய்திருக்க வேண்டும் என்பது அவசியம். விண்ணப்பதாரர்கள் குறைந்தபட்சம் 50 படுக்கைகள் கொண்ட மருத்துவமனையில் இரண்டு ஆண்டுகள் பணியாற்றிய அனுபவம் பெற்றிருக்க வேண்டும்.

வயது வரம்பைப் பொறுத்தவரை 18 முதல் 30 வயதுக்குள் இருக்க வேண்டும்; அரசு விதிகளின்படி குறிப்பிட்ட பிரிவினருக்கு வயது வரம்பில் தளர்வுகள் அளிக்கப்படும்.தேர்வு முறை மற்றும் கட்டண விவரங்களைப் பொறுத்தவரை, விண்ணப்பதாரர்கள் என்ஓஆர்சிஇடி முதல்நிலை மற்றும் முதன்மைத் தேர்வுகள் மூலம் தேர்ந்தெடுக்கப்படுவார்கள்.

இதற்கான விண்ணப்பக் கட்டணமாக பொதுப் பிரிவினர் ரூ.3,000 மற்றும் எஸ்.சி., எஸ்.டி., பொருளாதார ரீதியாக பின்தங்கிய பிரிவினர் ரூ.2,400 ஆன்லைன் மூலம் செலுத்த வேண்டும். இப்பதவிக்கு மாதம் ரூ.9,300 முதல் ரூ.34,800 வரை ஊதியம் வழங்கப்படும். கடைசி நேர நெரிசலைத் தவிர்க்க விண்ணப்பதாரர்கள் முன்கூட்டியே விண்ணப்பிப்பது நல்லது.