வருகின்ற 2026-ம் ஆண்டு நடைபெறவுள்ள டி20 உலகக் கோப்பை கிரிக்கெட் தொடருக்கான வங்கதேச அணியின் புதிய கேப்டனாக, அனுபவம் வாய்ந்த விக்கெட் கீப்பர்-பேட்ஸ்மேன் லிட்டன் தாஸ் அதிகாரப்பூர்வமாக நியமிக்கப்பட்டுள்ளார்.

இதுவரை டி20 அணியை வழிநடத்தி வந்த நஜ்முல் ஹொசைன் சாண்டோவுக்குப் பதிலாக லிட்டன் தாஸை வங்கதேச கிரிக்கெட் வாரியம் (BCB) தேர்வு செய்துள்ளது. கடந்த மே 2025 முதல் டி20 போட்டிகளுக்கு தற்காலிகமாகப் பொறுப்பேற்றிருந்த அவர், தற்போது இந்த வடிவிலான கிரிக்கெட்டிற்கு நிரந்தர கேப்டனாக அறிவிக்கப்பட்டுள்ளார். களத்திற்கு வெளியே பல்வேறு விமர்சனங்கள் எழுந்தபோதிலும், லிட்டன் தாஸின் அனுபவம் அணிக்கு வலு சேர்க்கும் எனத் தேர்வாளர்கள் அவர் மீது நம்பிக்கை தெரிவித்துள்ளனர்.

1994-ம் ஆண்டு வங்கதேசத்தின் தினாஜ்பூர் மாவட்டத்தில் பிறந்த லிட்டன் தாஸ், 2015-ம் ஆண்டு இந்தியாவுக்கு எதிரான டெஸ்ட் போட்டியின் மூலம் சர்வதேச கிரிக்கெட்டில் அறிமுகமானார். அதே ஆண்டில் ஒருநாள் மற்றும் டி20 போட்டிகளிலும் தடம் பதித்தார்.

2018 ஆசியக் கோப்பை இறுதிப்போட்டியில் இந்தியாவுக்கு எதிராக இவர் அடித்த சதம் இன்றளவும் பேசப்படும் இன்னிங்ஸாக உள்ளது.

2020-ல் ஜிம்பாப்வேக்கு எதிராக 176 ரன்கள் குவித்து, ஒருநாள் போட்டிகளில் வங்கதேச வீரரின் அதிகபட்ச ஸ்கோர் என்ற சாதனையைப் படைத்தார்.

இதுவரை சர்வதேச அளவில் டெஸ்டில் 3,117 ரன்களும், ஒருநாள் போட்டிகளில் 2,569 ரன்களும், டி20 போட்டிகளில் 2,655 ரன்களும் எடுத்துள்ளார்.

அண்மையில் நடைபெற்ற 2025 வங்கதேச பிரீமியர் லீக் (BPL) தொடரின் போது, டாக்கா கேபிடல்ஸ் அணிக்காக விளையாடிய லிட்டன் தாஸ், தனது மத அடையாளத்திற்காகச் சில தரப்பினரால் அவதூறாகப் பேசப்பட்டார். இருப்பினும், அத்தகைய விமர்சனங்களுக்குப் பதிலளிக்காமல் தனது ஆட்டத்தில் மட்டும் கவனம் செலுத்தி அமைதி காத்த விதம் கிரிக்கெட் வட்டாரத்தில் பெரும் வரவேற்பைப் பெற்றது.

தற்போது உலகக் கோப்பை போன்ற பெரிய தொடருக்கு கேப்டனாக நியமிக்கப்பட்டுள்ள லிட்டன் தாஸ், வங்கதேச அணியை அடுத்த கட்டத்திற்கு எடுத்துச் செல்வார் என அந்நாட்டு ரசிகர்கள் ஆவலுடன் எதிர்பார்த்துள்ளனர்.

மேலும் வங்கதேசத்தில் சிறுபான்மையினருக்கு எதிராக தாக்குதல் அதிகரித்து வரும் நிலையில் தற்போது இந்து மதத்தைச் சேர்ந்த லிட்டன் தாஸ் நிரந்தர கேப்டனாக நியமிக்கப்பட்டுள்ளது நெகிழ்ச்சியை ஏற்படுத்தி உள்ளது.