கடலூர் மாவட்டம் நெய்வேலி இந்திரா நகர் ஊராட்சியை சேர்ந்த கொளஞ்சியப்பன் (63) ஓய்வு பெற்ற என்எல்சி நிறுவன ஊழியராகவும், பிரபல தனியார் ஜவுளிக் கடையில் பாதுகாவலராக (செக்யூரிட்டி) வேலை பார்த்துவந்தவரும் ஆவார். அவருக்கு பத்மாவதி என்ற மனைவியும், ஒரு மகனும் மகளும் உள்ளனர். மகளுக்கு திருமணம் முடிந்த நிலையில், மகன் சென்னையில் உள்ள தனியார் கல்லூரியில் கல்வி பயின்றுவருகிறார்.

கடந்த சில ஆண்டுகளாகவே  தம்பதியிடையே, கருத்து வேறுபாடுகள் இருந்து வந்ததாக தெரிகிறது. குறிப்பாக கடந்த ஒரு மாதத்திற்குள் பத்மாவதிக்கு கணவர் மீது கடும் சந்தேகம் ஏற்பட்டது. இதையடுத்து, அவர் நேரடியாக காவல் நிலையத்தில் சென்று கணவருக்கு எதிராக புகாரும் அளித்திருந்தார். இதற்குப்பின் தம்பதிக்குள் தொடர்ந்து சண்டைகள், வார்த்தை மோதல்கள் நிகழ்ந்ததாக தகவல் வெளிவந்துள்ளது.

இந்த நிலையில், கொளஞ்சியப்பன் வீட்டில் நள்ளிரவில் தூங்கிக் கொண்டிருந்தபோது, பத்மாவதி தனது கணவனை அரிவாளால் கழுத்தை அறுத்து கொலை செய்துள்ளார். கணவன் உடல் ரத்தக்கறைகள் வீடு முழுவதும் பரவியிருந்த நிலையில், பத்மாவதி காலை வரை அவரின் சடலத்துடன் வீட்டில் இருந்ததாக கூறப்படுகிறது. பின்னர் தனது உறவினருக்கு தொலைபேசியில் “கணவரை கொன்றுவிட்டேன்” என தெரிவித்ததும், அதிர்ச்சியடைந்த உறவினர் தகவலை போலீசாருக்கு தெரிவித்துள்ளார்.

விவரம் அறிந்ததும் சம்பவ இடத்துக்கு வந்த போலீசார் உடலை கைப்பற்றி பிரேத பரிசோதனைக்கு அனுப்பி வைத்தனர். மேலும் பத்மாவதியை கைது செய்து, கொலை, திட்டமிட்டு வெறிச்செயல் போன்ற பிரிவுகளில் வழக்குப் பதிவு செய்துள்ளனர்.மேலும் இந்த சம்பவம் அந்த பகுதியில் பெரும் பரபரப்பை ஏற்படுத்தியுள்ளது.