ராஜஸ்தானில் உள்ள பிகானரில் கடந்த வியாழக்கிழமை நடைபெற்ற பொதுக்கூட்டத்தில் பிரதமர் நரேந்திர மோடி உரையாற்றியபோது, பாகிஸ்தான் மற்றும் சிந்து நதி நீர் ஒப்பந்தம் குறித்து முக்கியமான மற்றும் திட்டவட்டமான அறிக்கையை வெளியிட்டார்.

அதாவது “பாகிஸ்தான் பயங்கரவாதத்தை தொடர்ந்து ஆதரிக்கிற சூழ்நிலையில், இந்தியா தனக்கு  சொந்தமான ஒரு சொட்டு  தண்ணீரையும்  அவர்களுக்கு வழங்காது. இந்த உறுதியை யாராலும் மாற்ற முடியாது. ஒப்பந்தத்தின் இடைநிறுத்தம் அப்படியே தொடரும்” என மோடி தெரிவித்தார்.

பாகிஸ்தான் தீவிரவாதத்துக்கு துணை சென்றால் ஒரு நாளில் பிச்சை எடுக்கும் நிலைக்கு சென்று விடும் என்றும், இந்தியர்களை தாக்கும் செலவையும் அவர்கள் தாமாகவே ஏற்க வேண்டியதாகும் என்றும் கடுமையாக எச்சரித்தார்.

1960ஆம் ஆண்டு உலக வங்கியின் மத்தியஸ்தத்தில் இந்தியா மற்றும் பாகிஸ்தான் இடையே கையெழுத்தான சிந்து நதி நீர் ஒப்பந்தம் (Indus Waters Treaty), 6 நதிகளை இரு நாடுகளுக்கு பிரித்தது. சட்லஜ், பியாஸ், ரவி ஆகிய நதிகள் இந்தியாவுக்கும், சிந்து, ஜீலம், செனாப் ஆகியவை பாகிஸ்தானுக்குப் பகுதியாகவும் வழங்கப்பட்டன.

ஆனால் கடந்த பல ஆண்டுகளாக பயங்கரவாதத்தை தூண்டிவரும் பாகிஸ்தான், அந்த நல்லெண்ணத்தையும் உடைத்துவிட்டதாக பிரதமர் மோடி குற்றம் சாட்டினார். கடந்த ஏப்ரல் 22 ஆம் தேதி பஹல்காம் தாக்குதலுக்குப் பிறகு, மே 23, 2025 அன்று இந்தியா சிந்து நதி நீர்  ஒப்பந்தத்தை தற்காலிகமாக நிறுத்தியது என்பது குறிப்பிடத்தக்கது.

இதற்கிடையே, பஹல்காமில் நடைபெற்ற பயங்கரவாதத் தாக்குதலுக்குப் பதிலடியாக இந்தியா மேற்கொண்ட “ஆபரேஷன் சிந்தூர்” குறித்து மோடி பெருமையுடன் தெரிவித்தார். பாகிஸ்தானில் உள்ள 9 முக்கிய பயங்கரவாத முகாம்களை 22 நிமிடங்களில் அழித்தோம் என அவர் கூறினார்.

மேலும் “இந்தியாவின் உரிமையை எடுக்க யாராலும் முடியாது. ஒவ்வொரு குடிமகனும் பயங்கரவாதத்திற்கு எதிராக சபதம் எடுத்திருக்கிறோம். நமது படைகளின் தைரியத்தாலும், உறுதியாலும், அந்த வாக்குறுதியை நிறைவேற்றியுள்ளோம்” என்றார். வெளியுறவு அமைச்சர் ஜெய்சங்கரும், பாகிஸ்தானுடன் நடைபெறும் ஒரே உரையாடல் பயங்கரவாதத்தை ஒழிக்க வேண்டிய தேவை பற்றியது மட்டுமே என உறுதியாக தெரிவித்திருந்ததை மோடி நினைவூட்டினார்.