இந்தியாவின் யூனியன் பிரதேசமான லடாக்கில், கடல் மட்டத்திலிருந்து சுமார் 11,800 அடி உயரத்தில் உலகிலேயே மிக உயரமான கிரிக்கெட் மைதானத்தை அமைப்பதற்கான பிரம்மாண்ட திட்டத்தை லடாக் நிர்வாகம் தொடங்கியுள்ளது.
தலைநகர் லே-வுக்கு அருகே அமையவுள்ள இந்த சர்வதேச அளவிலான கிரிக்கெட் மைதானத்தைக் கட்ட சுமார் ரூ.100 கோடி செலவாகும் எனக் கணக்கிடப்பட்டுள்ளது. இதற்கான முதற்கட்ட நடவடிக்கையாக விரிவான திட்ட அறிக்கையை (DPR) தயாரிக்கும் பணிகளுக்கான டெண்டர்களை லடாக் நிர்வாகம் தற்போது அதிகாரப்பூர்வமாக வெளியிட்டுள்ளது.
இத்திட்டம் வெற்றிகரமாக நிறைவேறும் பட்சத்தில், உலக அளவில் மிக அதிக உயரத்தில் அமைக்கப்பட்ட சர்வதேச தரத்திலான கிரிக்கெட் மைதானம் என்ற புதிய வரலாற்றுச் சாதனையை இது படைக்கும். மேலும், இது லடாக் பகுதி இளைஞர்களின் விளையாட்டுத் திறனை ஊக்குவிப்பதோடு மட்டுமின்றி, அங்கு விளையாட்டுச் சுற்றுலாவையும் (Sports Tourism) புதிய உயரத்திற்கு கொண்டு செல்லும் என எதிர்பார்க்கப்படுகிறது.
மலைகளுக்கு நடுவே மேகங்களைத் தொடும் உயரத்தில் அமையவுள்ள இந்த கிரிக்கெட் ஸ்டேடியம் குறித்த செய்தி, தற்போது சர்வதேச கிரிக்கெட் ரசிகர்கள் மத்தியிலும் சோசியல் மீடியாவிலும் பெரும் வியப்பையும் எதிர்பார்ப்பையும் ஏற்படுத்தியுள்ளது.
