விநாயகர் என்றாலே பொதுவாகத் தும்பிக்கையுடன் கூடிய யானை முகம்தான் நினைவுக்கு வரும். ஆனால், இதற்கு முற்றிலும் மாறாகத் திருவாரூர் மாவட்டத்தில் உள்ள திலதர்ப்பணபுரி கிராமத்தில் அமைந்துள்ள அருள்மிகு முக்தீஸ்வரர் கோயிலில், விநாயகப் பெருமான் தும்பிக்கை இல்லாமல் முழுமையான மனித முகத்துடன் (நரமுக விநாயகர்) காட்சியளிக்கிறார். இக்கோவிலில் உள்ள விநாயகர் விசித்திரமான மற்றும் அரிய ஆன்மீகத் தோற்றத்துடன் பக்தர்களுக்கு அருள்வாலித்து வருகிறார்.
இங்குள்ள விநாயகர் தனது வலது காலைத் தொங்கவிட்டபடியும், இடது காலை மடித்தபடியும் அமர்ந்து, இடது கையை இடது காலின் மீது வைத்து, வலது கையில் பக்தர்களுக்கு அருள் வழங்கும் அபய முத்திரையைக் காட்டியபடி காட்சியளிக்கிறார். மேலும், இந்த திலதர்ப்பணபுரி தலம் நமது முன்னோர்களுக்குத் திதி மற்றும் தர்ப்பணம் கொடுப்பதற்குச் சிறந்த ஆன்மீகத் தலமாகக் கருதப்படுகிறது. மனித முகத்துடன் இருக்கும் இந்த அதிசய விநாயகரின் அரிய தகவல் ஆன்மீக அன்பர்களிடையே பெரும் வரவேற்பைப் பெற்றுள்ளது.
