பணம் இல்லாத காரணத்தால் ஏழை எளிய மாணவர்கள் தங்களது உயர்கல்வியைக் கைவிட்டுவிடக் கூடாது என்பதில் அரசு உறுதியாக உள்ளது. இந்த நிலையில், கல்லூரி மற்றும் உயர்கல்வி பயிலும் மாணவ, மாணவிகளுக்குப் பெரும் மகிழ்ச்சி தரும் அதிரடி அறிவிப்பு ஒன்றை உயர்கல்வித் துறை அமைச்சர் பி. விஸ்வநாதன் அவர்கள் வெளியிட்டுள்ளார்.

மாணவர்களின் நலனைக் கருத்தில் கொண்டு கல்விக்கடன் (Education Loan) வழங்கும் திட்டத்தில் மிக முக்கியமான மாற்றத்தை அரசு கொண்டு வந்துள்ளது.  அமைச்சர் விஸ்வநாதன் வெளியிட்டுள்ள அறிவிப்பின்படி, இதுவரை உயர்கல்வி பயிலும் மாணவர்களுக்கான கல்விக்கடன் வரம்பு ₹4.5 லட்சமாக இருந்தது, இனிமேல் ₹7.5 லட்சமாக உயர்த்தப்படும் என்று தெரிவிக்கப்பட்டுள்ளது.

இதன் மூலம் மருத்துவப் படிப்பு, பொறியியல் படிப்பு உள்ளிட்ட தொழில்முறை படிப்புகளைப் படிக்கும் நடுத்தர மற்றும் ஏழை எளிய குடும்பங்களைச் சேர்ந்த மாணவர்கள் தங்களுக்குத் தேவையான முழுக் கல்வித் தொகையையும் எவ்வித சிரமமும் இன்றி கடனாகப் பெற வழிவகை செய்யப்பட்டுள்ளது.

​மேலும் இதுகுறித்து விரிவாகப் பேசிய அமைச்சர், நடப்பு கல்வி ஆண்டில் மட்டும் சுமார் 1.50 லட்சம் மாணவர்களுக்குக் கல்விக்கடன் வழங்க இலக்கு நிர்ணயிக்கப்பட்டுள்ளதாகக் குறிப்பிட்டுள்ளார். இதற்காக மொத்தம் ₹3,000 கோடி நிதி ஒதுக்கீடு செய்யப்பட்டு, தகுதியான மாணவர்களுக்குக் கடனாக வழங்கப்படவிருக்கிறது.

​வங்கிகளில் கல்விக்கடன் பெறச் செல்லும் மாணவர்கள் எதிர்கொள்ளும் அலைச்சல்களையும், சிரமங்களையும் தவிர்க்க அரசு புதிய திட்டம் ஒன்றையும் கையில் எடுத்துள்ளது. கடன் பெற விரும்பும் மாணவர்களுக்கு உரிய வழிகாட்டுதல்களை வழங்கவும், அவர்களுக்குத் தேவையான உதவிகளைச் செய்யவும் மாவட்ட வாரியாகப் பேராசிரியர்கள் மற்றும் உதவிப் பேராசிரியர்கள் நியமனம் செய்யப்படவிருக்கிறார்கள் என்றும் அமைச்சர் விஸ்வநாதன் தெரிவித்துள்ளார். அரசின் இந்த அதிரடி நடவடிக்கையால் நடப்பாண்டில் பல்லாயிரக்கணக்கான மாணவர்கள் பெரிதும் பயனடைவார்கள் என எதிர்பார்க்கப்படுகிறது.