இரவின் அமைதி ஊரையெல்லாம் போர்த்திப் போர்த்திக் கிடந்த அந்த நள்ளிரவு நேரம். திருப்பத்தூர் மாவட்டம் நாட்றம்பள்ளி அருகே உள்ள அந்த அமைதியான கிராமத்தில், மனிதர்களின் நடமாட்டம் முற்றிலும் ஒடுங்கிப்போயிருந்தது. உழைத்துக்களைத்த மனிதர்கள் ஆழ்ந்த உறக்கத்தில் மூழ்கியிருக்க, இருளின் நிழலை மட்டுமே ஆடையாகப் போர்த்திக்கொண்டு ஒரு மர்ம உருவம் அந்த வீட்டின் வாசலை நோக்கி மெல்ல நகர்ந்தது.

கையில் இருந்த இரும்பு ஆயுதத்தால் வீட்டின் பூட்டை உடைக்கும் சத்தம், அந்த நள்ளிரவின் அமைதியைக் கிழித்தது. தான் செய்யப்போகும் திருட்டின் மூலம் கோடிக்கணக்கில் சுருட்டிவிடலாம் என்ற மமதையில், கதவைத் திறக்கப் போராடிக்கொண்டிருந்தான் அந்தத் திருடன்.

ஆனால், தான் பூட்டை உடைக்கவில்லை… தன் சொந்தப் பொறியில் தானே போய் விழப்போகிறோம் என்பது அந்தத் திருடனுக்கு அப்போது தெரிந்திருக்க வாய்ப்பில்லை!

வீட்டின் உரிமையாளர் அன்றைய தினம் வெளியூரில் இருந்தார். இருப்பினும், தனது வீட்டையும் அதில் உள்ள உடைமைகளையும் பாதுகாக்க அவர் கையாண்ட அந்தச் சிறிய ‘டிஜிட்டல்’ பாதுகாப்பு நுட்பம் தான் அன்றைய இரவின் மிகப்பெரிய திருப்புமுனையாக மாறியது!

வீட்டின் வாசலில் வைக்கப்பட்டிருந்த வைஃபை (Wi-Fi) சிசிடிவி கேமரா, யாரோ ஒரு புதியவன் கதவை உடைக்க முயல்வதை உடனடியாக உணர்ந்து, மைல்கள் தொலைவில் இருந்த உரிமையாளரின் மொபைல் போனுக்கு ‘அலார’ எச்சரிக்கையை அனுப்பியது.

திடுக்கிட்டு எழுந்த வீட்டின் உரிமையாளர், தனது மொபைல் திரையைப் பார்த்தபோது அதிர்ந்துபோனார்! அங்கே ஒரு திருடன் வீட்டின் பூட்டை உடைக்கத் தீவிரமாக முயன்று கொண்டிருந்தான். பதற்றமடைந்து கை கால் நடுங்க உட்கார்ந்திருக்க அவர் ஒன்றும் சாதாரண மனிதர் அல்லவே!

அடுத்த கணமே, தனது மொபைல் செயலி (App) மூலம், வீட்டில் பொருத்தப்பட்டிருந்த சிசிடிவி கேமராவின் ‘அலாரம் ஸ்பீக்கரை’ச் செயலாக்கினார்.

நள்ளிரவு 2 மணிக்கு, அந்தப் பாழடைந்த தெருவில் சிசிடிவி கேமராவிலிருந்து திடீரென விண்ணைப் பிளக்கும் அளவுக்கு அலாரம் சத்தம் பெருக்கெடுத்து முழங்கியது!

” அந்த பேரிரைச்சலைக் கேட்டதும், பூட்டை உடைத்துக் கொண்டிருந்த திருடனின் நெஞ்சு ஒரு கணம் நின்று துடித்திருக்கும். தன்னை யாரோ கண்காணித்துக் கொண்டிருக்கிறார்கள், மாட்டிவிட்டோம் என்பதை உணர்ந்த அந்தத் திருடனின் கை கால்கள் நடுக்கத்தில் நடுங்கின.

கையில் இருந்த ஆயுதங்களை அள்ளிப் போட்டுக்கொண்டு, சுற்றும் முற்றும் பார்த்து அலறி அடித்தபடி, இருட்டோடு இருட்டாக ஓடி மறைந்தான். ஒரு சிறிய நகை, ஒரு ரூபாய் காசு கூட அவனுக்குக் கிடைக்கவில்லை. வீட்டின் உரிமையாளர் அடித்த ‘டிஜிட்டல் விபூதியில்’, அந்தத் திருடன் வெறும் கையோடு ஓட்டம் பிடித்தான்!

“>

குற்றம் செய்பவர்கள் எப்போதுமே ஒருபடி முன்னால் யோசிப்பதாக நினைத்துக் கொள்கிறார்கள். ஆனால், விழிப்புணர்வோடு இருக்கும் ஒரு சாமானிய மனிதனின் சமயோசிதப் புத்தி, எத்தகைய குற்றத்தையும் முறியடித்துவிடும் என்பதற்கு இந்த நாட்றம்பள்ளி சம்பவமே மிகச்சிறந்த உதாரணம்.

பயந்து நடுங்குவதை விட, தொழில்நுட்பத்தையும் சமயோசித அறிவையும் சரியாகப் பயன்படுத்தினால், ஆபத்தின் பிடியிலிருந்தும் நமது உழைப்பின் அடையாளங்களிலிருந்தும் நம்மைக் காப்பாற்றிக் கொள்ள முடியும் என்பதை இந்தச் சம்பவம் உலகிற்கு உணர்த்துகிறது.

உரிமையாளரின் சாதுரியத்தால் திருப்பத்தூர் காவல்துறையும், அந்த கிராம மக்களும் இன்று அந்த வீட்டின் உரிமையாளரைப் பெருமையோடு பாராட்டி வருகின்றனர்!