மேற்கு வங்காளத்தின் வடக்கு 24 பர்கானாஸ் மாவட்டத்தில் உள்ள மத்தியகிராமில் கடந்த சில வாரங்களில் தொடர்ச்சியாக ஆறு வீடுகளில் திருட்டு சம்பவங்கள் நடந்தன. இந்த சம்பவங்கள் குறித்து புகார்கள் வந்த பின், போலீசார் விசாரணையை தீவிரப்படுத்தினர். திருட்டுக்கு பின்னால் இருந்தது பணிப்பெண் ஒருவரின் பேஸ்புக் பதிவு என்பது தெரியவந்தது.

பூஜா சர்தார் என்ற பணிப்பெண் தனது சகோதரியின் வீட்டில் வேலை செய்து வந்திருந்தார். அந்த வீட்டில் நடந்த திருமண விழாவில் பங்கேற்ற பின், அவர் தனது பேஸ்புக் கணக்கில் சில புகைப்படங்களை பதிவிட்டார்.

அதில், வீட்டில் இருந்து திருடப்பட்ட இரண்டு விலையுயர்ந்த புடவைகளை அவர் அணிந்து இருந்தது புகார்தாரருக்கு சந்தேகத்தை எழுப்பியது. இதனையடுத்து அவர் போலீசாரிடம் புகார் அளித்தார். அவரது பேஸ்புக் ஸ்டேட்டஸின் ஸ்கிரீன் ஷாட், குடும்ப உறுப்பினரின் சாட்சியம் உள்ளிட்டவை போலீசாருக்கு முக்கிய ஆதாரமாக அமைந்தது.

புகாரின் அடிப்படையில், போலீசார் பூஜா சர்தாரின் வீட்டில் சோதனை நடத்தினர். அந்த சோதனையில், திருடப்பட்ட நகைகள், புடவைகள் உள்ளிட்ட பொருட்கள் பறிமுதல் செய்யப்பட்டன.

மேலும், விசாரணையில் இவருடன் கூட்டாக திருட்டில் ஈடுபட்ட நால்வரும் அடையாளம் காணப்பட்டனர். இதனையடுத்து, போலீசார் பூஜா சர்தாரையும், அவரது நான்கு கூட்டாளிகளையும் கைது செய்து சிறையில் அடைத்தனர்.

போலீசார் அளித்த தகவலின்படி, திருடர்களின் திட்டமிட்ட செயலைக் கருதி வழக்கு பதிவு செய்யப்பட்டுள்ளது. கைது செய்யப்பட்டவர்கள் மீது குற்றச்சாட்டு உறுதி செய்யப்பட்டதைத் தொடர்ந்து, அவர்களிடம் தொடர்ந்து விசாரணை மேற்கொள்ளப்பட்டு வருகிறது. மீட்கப்பட்ட நகைகள் மற்றும் புடவைகள் உரிமையாளர்களிடம் ஒப்படைக்கப்பட்டன.