ஆஸ்திரேலியாவின் அடிலெய்டில் உள்ள கான்கார்டியா கல்லூரி மைதானத்தில் உள்ளூர் கிரிக்கெட் போட்டி நடைபெற்றபோது, பாகிஸ்தான் வம்சாவளியைச் சேர்ந்த 40 வயதான ஜுனைத் ஜாபர் கான் திடீரென மயங்கி விழுந்து உயிரிழந்த சம்பவம் பெரும் அதிர்ச்சியை ஏற்படுத்தியுள்ளது. தொழில்நுட்ப துறையில் பணிபுரிந்து வந்த ஜுனைத், கிரிக்கெட்டில் ஆர்வம் கொண்டு ஆஸ்திரேலிய உள்ளூர் அணிகளில் விளையாடி வந்தார். கடந்த மார்ச் 15ஆம் தேதி நடைபெற்ற இந்த போட்டியின் போது, கடும் வெப்பநிலையில் விளையாடிக் கொண்டிருந்த அவர் திடீரென மயங்கி விழுந்தார். உடனே மருத்துவர்கள் அவருக்கு முதலுதவி அளித்தும், அது பலனளிக்கவில்லை, இதனால் அவர் மைதானத்திலேயே உயிரிழந்ததாக மருத்துவர்கள் தெரிவித்துள்ளனர்.

இந்த சம்பவம் வெப்பச்சலிப்பின் தாக்கத்தை எச்சரிக்கையாகக் கொள்ள வேண்டிய அவசியத்தை உணர்த்துகிறது. குறிப்பாக, 41.7°C வெப்பநிலையில் போட்டி நடைபெற்றதால் உடல் தாங்காமல் இருக்கக்கூடும் என கூறப்படுகிறது. மேலும், ஜுனைத் ரம்ஜான் நோன்பு இருந்து வந்ததால், நீர்ச்சத்து குறைவாக இருப்பதும் உயிரிழப்பிற்கு காரணமாக இருக்கலாம் என்றும் கருதப்படுகிறது. ஆஸ்திரேலியாவில் வெப்பநிலை 42°C ஐ கடந்தால் போட்டிகள் ரத்து செய்யப்படும் என கூறப்பட்டிருந்தாலும் இந்த போட்டியில் முன்னெச்சரிக்கை நடவடிக்கைகள் எடுக்கப்படாதது கேள்விக்குறியாக உள்ளது. விளையாட்டு வீரர்கள், உடற்பயிற்சியில் ஈடுபடுவோர், மற்றும் நீண்ட நேரம் வெளியில் இருப்பவர்கள் கடும் வெப்பத்திலிருந்து தங்களை பாதுகாக்க கட்டாயம் தேவையான முன்னெச்சரிக்கைகளை மேற்கொள்ள வேண்டும்.