நடிகர் கமல்ஹாசன் மற்றும் இயக்குநர் மணிரத்னம் கூட்டணியில் 36 ஆண்டுகளுக்குப் பிறகு உருவாகியுள்ள படம் ‘தக் லைப்’. இந்தப் படத்தில் சிம்பு, திரிஷா, ஜோஜு ஜார்ஜ், ஐஸ்வர்யா லட்சுமி, கவுதம் கார்த்திக், பாலிவுட் நடிகர் அலி பசல் உள்ளிட்டோர் முக்கிய கதாபாத்திரங்களில் நடித்துள்ளனர்.

இசையமைப்பாளர் ஏ.ஆர்.ரகுமான் இசையமைத்துள்ள இந்தப் படத்தை, ராஜ்கமல் பிலிம்ஸ் இன்டர்நேஷனல், மெட்ராஸ் டாக்கீஸ் மற்றும் ரெட் ஜெயன்ட் மூவிஸ் இணைந்து தயாரித்துள்ளனர். படம் ஜூன் 5ம் தேதி உலகமெங்கும் திரையரங்குகளில் வெளியாக உள்ளது.

‘தக் லைப்’ படத்தின் பாடல்கள் ஏற்கனவே ரசிகர்கள் மத்தியில் வரவேற்பைப் பெற்றுள்ளன. ‘ஜிங்குச்சா’ எனும் முதல் பாடல் மட்டும் யூடியூப்பில் 4 கோடியை கடந்துள்ளதை குறிப்பிடத்தக்கது. இந்தப் பாடலை ஆதித்யா, வைஷாலி சமந்த் மற்றும் சக்தி ஸ்ரீ கோபாலன் பாடியுள்ளனர். இந்நிகழ்வில் வெளியான ட்ரெய்லர், கமல்ஹாசன் நடிப்பில் கடந்த 2022ல் வெளியான ‘விக்ரம்’ படத்தின் ட்ரெய்லர் சாதனையை முறியடித்துள்ளது.

சென்னையில் நடைபெற்ற இசை வெளியீட்டு விழாவில், கமல்ஹாசன், மணிரத்னம், சிம்பு உள்ளிட்ட படக்குழுவினர் கலந்துகொண்டனர். விழாவில் பேசும் போது கமல்ஹாசன், “சிலம்பரசன் போகப்போகும் தூரம் எனக்குத் தெரிகிறது. இது சுமை அல்ல; சுகம். அதை அனுபவிக்க வேண்டும். எம்எல்ஏ ஆகாமலே 40 ஆண்டுகளாக மக்கள் பணியை செய்துகொண்டிருக்கிறோம்” என்றார். இந்நிகழ்வின் மூலம் ‘தக் லைப்’ திரைப்படம் மீதான எதிர்பார்ப்பு மேலும் அதிகரித்து வருவது குறிப்பிடத்தக்கது.