அமெரிக்காவில் சாதாரணப் பணிகளைச் செய்யும் தொழிலாளர்களின் வருமானம் மற்றும் அவர்களின் ஆடம்பர வாழ்க்கை முறை குறித்து இந்திய உள்ளடக்க உருவாக்குநர் (Content Creator) ஒருவர் இன்ஸ்டாகிராமில் வெளியிட்ட வீடியோ தற்பொழுது இணையதளங்களில் பெரும் விவாதத்தைக் கிளப்பியுள்ளது. அமெரிக்காவில் புல் வெட்டும் வேலை செய்யும் ஒரு நபர், இந்திய மதிப்பில் மாதத்திற்கு 10 லட்சம் ரூபாய்க்கும் அதிகமாகச் சம்பாதிப்பதோடு மட்டுமில்லாமல், ‘ஆடி’ போன்ற உலகத்தரம் வாய்ந்த ஆடம்பர காரைப் பயன்படுத்துவதாகவும் அந்த வீடியோவில் அவர் குறிப்பிட்டுள்ளார். வெளிநாடுகளில் உடல் உழைப்பை மூலதனமாகக் கொண்டு செய்யப்படும் சாதாரண வேலைகளுக்குக் கூட மிக அதிக அளவிலான ஊதியம் வழங்கப்படுகிறது என்பதையும், அதன் மூலம் அங்குள்ளவர்களால் சொகுசு வாழ்க்கையை வாழ முடிகிறது என்பதையும் சுட்டிக்காட்டி அவர் இந்த வீடியோவை வெளியிட்டுள்ளார்.

இந்த வீடியோ சமூக வலைதளங்களில் மிக வேகமாகப் பரவி, நெட்டிசன்கள் மத்தியில் கடுமையான விவாதங்களை உருவாக்கியுள்ளது. ஒரு தரப்பினர் வெளிநாடுகளில் உழைப்புக்குக் கிடைக்கும் தகுந்த மரியாதையையும், எந்த ஒரு வேலையையும் தாழ்வாக நினைக்காத மனப்பக்குவத்தையும் பாராட்டி வரும் வேளையில், மற்றொரு தரப்பினர் அங்குள்ள வாழ்க்கைச் செலவுகள், வரிகள் மற்றும் மருத்துவச் செலவுகள் மிக அதிகம் என்பதால் இந்த வருமானம் சாதாரணமானது தான் என்று தங்களது மாற்றுத் தர்க்கங்களை முன்வைத்து வருகின்றனர். இந்தியப் இளைஞர்கள் பலரும் வெளிநாட்டு வேலை வாய்ப்புகளை நோக்கித் தங்களது கவனத்தைத் திருப்பி வரும் இந்தச் சூழலில், இன்ஸ்டாகிராம் இன்ஃப்ளூயன்சரின் இந்த அதிரடியான பதிவு ஒட்டுமொத்த இணைய உலகத்தையும் தன்பக்கம் திரும்பிப் பார்க்க வைத்துள்ளது.