ஆஸ்திரேலியாவில் உள்ள டார்வின் மைதானத்தில் நடைபெற்ற முதல் டெஸ்ட் கிரிக்கெட் போட்டியில், பலம் வாய்ந்த ஆஸ்திரேலிய அணியை பங்களாதேஷ் அணி ஒன்பது விக்கெட்டுகள் வித்தியாசத்தில் பந்தாடி வரலாற்றுச் சாதனை படைத்துள்ளது. இந்தத் கோரத் தோல்வி ஆஸ்திரேலிய கிரிக்கெட் வட்டாரத்தில் பெரும் அதிர்லவலைகளை ஏற்படுத்தியுள்ளதோடு, முன்னாள் ஜாம்பவான்களான ரிக்கி பாண்டிங், மார்க் வாக் மற்றும் மேத்யூ ஹெய்டன் ஆகியோரை உறைந்து போகச் செய்துள்ளது.

ஆஸ்திரேலிய அணி சொந்த மண்ணில் முழு பலத்துடன் களமிறங்கிய போதிலும், ஆடுகளத்தின் அனைத்துத் துறைகளிலும் பங்களாதேஷ் அணியிடம் படுதோல்வி அடைந்தது. பங்களாதேஷ் அணியின் நட்சத்திர பந்துவீச்சாளர்களான நாகித் ரானா மற்றும் ஷோரிபுல் இஸ்லாம் போன்ற முன்னணி வீரர்கள் காயம் காரணமாக இடம்பெறாத நிலையிலும், இளம் வீரர்களைக் கொண்ட பங்களாதேஷ் அணி ஆஸ்திரேலியாவைச் சொந்த மண்ணில் சுருட்டியுள்ளது.

போட்டியின் தொடக்கத்திலிருந்தே ஆதிக்கம் செலுத்திய பங்களாதேஷ் அணி, வரலாற்றுச் சிறப்புமிக்க இந்த அபார வெற்றியைப் பதிவு செய்தது. ஆஸ்திரேலிய அணியின் கேப்டன் பாட் கம்மின்ஸ் கூட, எதிரணி தங்களை விட மிகச் சிறப்பாக விளையாடியதை வெளிப்படையாக ஒப்புக்கொண்டார். ஆஸ்திரேலிய கிரிக்கெட் வரலாற்றில் இதற்கு முன்பு பல தோல்விகளைப் பார்த்திருந்தாலும், இந்தத் தோல்வி தங்களை மிகவும் உலுக்கியுள்ளதாக முன்னாள் வீரர்கள் கொதித்துப் போயுள்ளனர்.

 

இது குறித்துப் பேசிய மார்க் வாக், “ஆஸ்திரேலிய கிரிக்கெட் வரலாற்றில் நான் பார்த்ததிலேயே இதுதான் மிகப்பெரிய அதிர்ச்சியாக இருக்கக்கூடும். சில ஆண்டுகளுக்கு முன்பு கபாவில் வெஸ்ட் இண்டீஸ் அணி வென்றது ஒரு அதிர்ச்சிதான். ஆனால், அணியின் தரம், முழு பலத்துடன் களமிறங்கிய ஆஸ்திரேலியா மற்றும் முக்கிய பவுலர்கள் இல்லாத பங்களாதேஷ் அணியின் இந்த வெற்றி நம்ப முடியாத ஒன்று” என்று வியப்புடன் குறிப்பிட்டார்.

இதேபோல், முன்னாள் கேப்டன் ரிக்கி பாண்டிங் இந்தத் தோல்வியை “மிகவும் அவமானகரமான தோல்வி” என்று கடுமையாக விமர்சித்துள்ளார். அணிக்கு உடனடியாகப் புத்துயிர்  ஊட்டும் வகையில் பேட்டிங் வரிசையில் பெரிய மாற்றங்களைச் செய்ய வேண்டும் என்றும், புதிய தொடக்க வீரரை களமிறக்க வேண்டிய நேரம் இதுவென்றும் அவர் வலியுறுத்தியுள்ளார். இதற்கிடையே, தொடக்க வீரர் டிராவிஸ் ஹெட்டை மீண்டும் ஐந்தாவது இடத்திற்கு மாற்ற வேண்டும் என்று மேத்யூ ஹெய்டன் கோரிக்கை விடுத்துள்ளார். இரண்டாவது டெஸ்ட் போட்டிக்கு முன்பாக ஆஸ்திரேலிய அணியில் அதிரடி மாற்றங்கள் நிகழும் என்று எதிர்பார்க்கப்படுகிறது.