பிரபல தெலுங்கு நாட்டுப்புற பாடகரான ஈஸ்வர் சாய் மற்றும் அவருடன் இணைந்து பாடி வரும் மாதுரி ரத்தோட் ஆகிய இருவரையும் ஒரே அறையில் வைத்து சாயின் மனைவி பிடித்ததாகக் கூறப்படும் சம்பவம் பெரும் பரபரப்பை ஏற்படுத்தியுள்ளது. வேமுலவாடாவில் உள்ள ஒரு தனியார் கட்டிடத்தில் நள்ளிரவில் இருவரும் இருந்தபோது அங்கு வந்த சாயின் மனைவி, மாதுரியிடம் கடுமையாக வாக்குவாதத்தில் ஈடுபட்டுள்ளார்.

இந்தச் சம்பவம் குறித்து ஊடகங்களிடம் பேசிய சாயின் மனைவி, தங்களுக்குத் திருமணமாகி ஏழு ஆண்டுகள் ஆவதாகவும், ஒரு மகன் இருப்பதாகவும் தெரிவித்தார். ஆரம்பத்தில் மாதுரிக்குத் தான் ஆதரவாக இருந்ததாகவும், ஆனால் அவர் தனது குடும்ப வாழ்க்கையில் நுழைந்து அதைச் சீர்குலைத்துவிட்டதாகவும் கண்ணீருடன் குற்றம் சாட்டினார். மேலும், தன் கணவர் நல்லவர் என்றும், மாதுரியே அவர் பின்னால் சுற்றுகிறார் என்றும் அவர் கூறியுள்ளார்.

இரு பெண்களுக்கும் இடையே நடந்த இந்த காரசாரமான வாக்குவாதம் வீடியோவாகப் பதிவாகி, தற்போது சமூக வலைதளங்களில் காட்டுத்தீ போல வைரலாகி வருகிறது. இச்சம்பவம் தொடர்பாக ஈஸ்வர் சாயின் மனைவி காவல் நிலையத்திலும் புகார் அளித்துள்ளார். கள்ளத்தொடர்பு இருப்பதாகக் கூறப்படும் இந்த குற்றச்சாட்டுகள் குறித்து காவல்துறையினர் விசாரணை நடத்தி வருகின்றனர்.

ஈஸ்வர் சாய் மற்றும் மாதுரி ரத்தோட் ஆகிய இருவரும் தெலுங்கு திரையுலகிலும் சமூக வலைதளங்களிலும் மிகவும் பிரபலமான நாட்டுப்புறக் கலைஞர்கள் ஆவர். இவர்கள் இணைந்து பல பாடல்களைப் பாடியுள்ளதுடன், ‘பிரமீலா’ என்ற திரைப்படத்திலும் ஒன்றாக நடித்துள்ளனர். இதனால் இந்த விவகாரம் தெலுங்கு இசை வட்டாரத்தில் பெரும் அதிர்ச்சியை ஏற்படுத்தியுள்ளது.

அன்றைய இரவில் உண்மையிலேயே அங்கு என்ன நடந்தது, குற்றச்சாட்டுகளில் உண்மை இருக்கிறதா என்பது குறித்துப் போலீசார் தொடர்ந்து விசாரணை நடத்தி வருகின்றனர். இருப்பினும், இந்த வைரல் வீடியோ இணையத்தில் தொடர்ந்து பரவி, மக்கள் மத்தியில் பெரும் விவாதப் பொருளாக மாறியுள்ளது.