புது தில்லியின் ஷாஹதாரா காவல் நிலையம் அருகே, சுதந்திர தினத்துக்கு சில மணி நேரங்களுக்கு முன்பு, ஆகஸ்ட் 14, 2025 இரவு 1.07 மணியளவில், 27 வயது இளைஞர் அகில் பன்வார் மீது துப்பாக்கிச் சூடு நடத்தப்பட்ட சம்பவம் அதிர்ச்சியை ஏற்படுத்தியுள்ளது. டிக்கோனா பூங்கா அருகே நடந்த இந்தத் தாக்குதலில், அகில் நான்கு தோட்டாக்களால் காயமடைந்தார்.

காவல் நிலையத்துக்கு காலை 1.43 மணிக்கு வந்த அவசர அழைப்பில், சவுரவ் மற்றும் கவுரவ் நாகர் என்ற இரு சகோதரர்கள், அகிலை  வரவழைத்து துப்பாக்கியால் சுட்டதாகத் தெரிவிக்கப்பட்டது. உடனடியாக மேக்ஸ் மருத்துவமனையில் சேர்க்கப்பட்ட அகில், தற்போது ஆபத்தான நிலையில் இருந்து மீண்டு விட்டதாக மருத்துவமனை வட்டாரங்கள் தெரிவிக்கின்றன.

இந்தத் தாக்குதலுக்கு, அகிலுக்கும், குற்றவாளிகளுக்கும் இடையே தகராறின் போது மோசமான வார்த்தைகள் பரிமாறப்பட்டது காரணம் எனக் காவல்துறை தெரிவித்துள்ளது. தலைமறைவாக உள்ள சவுரவ் மற்றும் கவுரவ் நாகரை பிடிக்க காவல்துறை தீவிரமாகத் தேடி வருகிறது. இந்த வழக்கு, பதிவு செய்யப்பட்டு, விசாரணை நடந்து வருகிறது.

இதேபோன்று, இந்த வார தொடக்கத்தில், தில்லியின் கீதா காலனி பகுதியில் பணத் தகராறு காரணமாக 25 வயது இளைஞர் ஷிவம் ஷர்மா மீது மூன்று பேர் துப்பாக்கிச் சூடு நடத்திய சம்பவமும் நடந்துள்ளது. ஷிவம், குந்தன் நகரைச் சேர்ந்த ஷீத்தல் மற்றும் அவரது கணவர் சோனுவுக்கு கடன் கொடுத்திருந்தார்.

ஆனால், அவர்கள் பணத்தைத் திருப்பித் தர மறுத்ததால், ஜகத்புரி சிவப்பு விளக்கு அருகே தகராறு ஏற்பட்டது. பின்னர், ஷிவம் தனது நண்பர் ஜதின் நாக்பாலுடன் தாஜ் என்கிளேவ் பகுதிக்குச் சென்று பேச்சுவார்த்தை நடத்த முயன்றபோது, ஷதாப், ஹர்ஷு, மற்றும் ராமன் ஆகிய மூன்று பேர் அவர்களை எதிர்கொண்டு தாக்குதல் நடத்தினர். இதில், ஷதாப் துப்பாக்கியால் சுட்டதில், ஷிவம் இரண்டு தோட்டாக்களால் காயமடைந்தார். மூன்று குற்றவாளிகளும் தப்பியோட, காவல்துறை அவர்களைப் பிடிக்க தீவிர தேடுதல் வேட்டையில் ஈடுபட்டுள்ளது.