மத்தியப் பிரதேசம், போபாலில் ஐஷ்பாக் பகுதியில் புதிதாக கட்டப்பட்ட ரயில் மேம்பாலம் (ROB) தற்போது சர்ச்சையில் சிக்கியுள்ளது. இந்த மேம்பாலம் 90 டிகிரி கூர்மையான திருப்பம் கொண்ட வகையில் கட்டப்பட்டிருப்பதால், பொதுமக்கள் மற்றும் வாகன ஓட்டிகளிடையே பயமும், அதிருப்தியும் ஏற்பட்டுள்ளது. வாகனங்கள் அந்த திருப்பத்தை எப்படி எளிதாக எடுக்க முடியும் என்று சமூக வலைதளங்களில் பலரும் கேள்வி எழுப்பினர். இந்த மோசமான வடிவமைப்பு காரணமாக, பாலம் திறக்கும் முன்பே விமர்சனங்களையும் கேலிகளையும் சந்தித்து வருகிறது.

இதற்கான காரணங்களைப் பரிசோதித்த மத்தியப் பிரதேச முதல்வர் மோகன் யாதவ், “பாலம் கட்டப்பட்ட விதத்தில் கடுமையான அலட்சியம் உள்ளது என்பதை கண்டறிந்து, உடனடியாக விசாரணை நடத்த உத்தரவிட்டேன். விசாரணையின் அடிப்படையில் பொறியாளர்கள் மீது நடவடிக்கை எடுக்கப்பட்டது,” என்று தெரிவித்துள்ளார். இதில் இரண்டு தலைமைப் பொறியாளர்கள் உட்பட ஏழு பொறியாளர்கள் இடைநீக்கம் செய்யப்பட்டனர். ஓய்வுபெற்ற கண்காணிப்பாளர் பொறியாளர் மீது துறை ரீதியான விசாரணை நடத்தப்படும் என்றும் அவர் கூறினார்.

இடைநீக்கம் செய்யப்பட்ட பொறியாளர்களின் பெயர்களை பொதுப்பணித்துறை கூடுதல் தலைமைச் செயலாளர் நீரஜ் மாண்ட்லோய் அறிவித்துள்ளார். அவர்களில் தலைமைப் பொறியாளர்கள் சஞ்சய் காண்டே, ஜி.பி. வர்மா, நிர்வாகப் பொறியாளர் ஜாவேத் ஷகீல், துணைப் பொறியாளர் உமாசங்கர் மிஸ்ரா, உதவிப் பொறியாளர் ஷானுல் சக்சேனா மற்றும் நிர்வாகப் பொறியாளர் ஷபானா ரஜ்ஜாக் ஆகியோர் அடங்குவர். மேலும் கட்டுமான நிறுவனம் M/s புனித் சத்தா மற்றும் வடிவமைப்பு ஆலோசகர் M/s டைனமிக் ஆலோசகர் ஆகிய இருவரும் அரசாங்கத்தின் கருப்புப் பட்டியலில் சேர்க்கப்பட்டுள்ளனர்.

18 கோடி ரூபாய் செலவில் கட்டப்பட்ட இந்த மேம்பாலம், மஹாமாய் கா பாக், புஷ்பா நகர் மற்றும் நியூ போபால் ரயில்நிலையத்தை இணைக்கும் முக்கியப் புலனாக இருக்கிறது. சுமார் மூன்று லட்சம் மக்கள் பயனடைவார்கள் என எதிர்பார்க்கப்பட்ட நிலையில், இந்த வடிவமைப்பு பெரும் விவாதத்துக்கு இடமளித்துள்ளது. நிலப் பற்றாக்குறை மற்றும் அருகில் மெட்ரோ நிலையம் இருப்பது போன்ற காரணங்களால் இந்த வடிவமைப்பு தவிர்க்க முடியாததாக இருந்ததாக அதிகாரிகள் கூறினாலும், முதல்வர், “மேம்பாடுகள் செய்யப்பட்ட பின்னரே இந்த பாலம் பொதுமக்களுக்கு திறக்கப்படும்” எனத் தெளிவாக தெரிவித்தார்.