அமெரிக்காவின் அதிபர் டொனால்ட் டிரம்ப் மற்றும் டெஸ்லா நிறுவனத் தலைவர் எலான் மஸ்க் இடையே தற்போது மோதல் நிலவி வருகிறது. சமீபத்தில் அமெரிக்க காங்கிரஸில் நிறைவேற்றப்பட்ட புதிய வரி மற்றும் செலவுத்திட்ட மசோதாவை மஸ்க் கடுமையாக விமர்சித்திருந்தார். இதில், மின்சார வாகனங்களுக்கு வழங்கப்படும் சலுகைகள் குறைக்கப்படுவதால் தன் நிறுவனத்துக்கு பாதிப்பு ஏற்படும் என அவர் தெரிவித்திருந்தார்.

இந்த விமர்சனங்களுக்கு பதிலளித்த டிரம்ப், “எலானிடம் நான் மிகவும் ஏமாற்றமடைந்தேன். அவருக்கு நான் பல உதவிகளை செய்துள்ளேன்,” என வருத்தம் தெரிவித்தார். ஓவல் அலுவலகத்தில் செய்தியாளர்களிடம் பேசிய டிரம்ப், “மஸ்குடன் எனக்கு இருந்த உறவு சிறந்ததுதான். ஆனால் தற்போது அவர் என்னைப் பற்றி பேசும் பேச்சு, அவரது நிலைப்பாடுகள், எதிர்காலத்தில் நாங்கள் ஒரே பாதையில் இருப்போமா என்பது தெரியவில்லை,” எனவும் கூறினார்.

மசோதா தொடர்பான விவாதத்தில், “இந்த மசோதா நிறைவேறுவதற்கு முன் எலானிடம் ஆலோசிக்கப்பட்டது. அதனால், பின்னர் விமர்சிக்கத் தேவையில்லை,” எனவும் டிரம்ப் கண்டனம் தெரிவித்தார். இந்த கருத்துகளுக்குப் பதிலளித்த எலான் மஸ்க், டிரம்பின் குற்றச்சாட்டுகளை முழுமையாக மறுத்தார். “இந்த மசோதா எனக்கு ஒருபோதும் காண்பிக்கப்படவில்லை.

இறவோடு இறவாக, மிக வேகமாக, உரிய மதிப்பீடு இல்லாமல் காங்கிரஸில் முடிவடைந்தது. இது அமெரிக்க வரலாற்றில் மிக மோசமான அரசியல் செயல்,” என அவர் தனது X கணக்கில் தெரிவித்தார். மேலும், தனது விமர்சனங்கள் தனிநபர் மீது அல்ல, மசோதாவின் விளைவுகளைப் பற்றியது எனவும் அவர் விளக்கம் அளித்தார்.

இந்த விவகாரத்தில், மஸ்க் சமீபத்தில் DOGE தலைவர் பதவியில் இருந்து விலகியதும், அவரது அரசியல் நிலைப்பாட்டில் மாற்றம் ஏற்பட்டதற்குக் காரணமாக கூறப்படுகிறது. டிரம்ப் மற்றும் மஸ்க் இருவரும் கடந்த காலங்களில் பரஸ்பர ஆதரவை வெளிப்படுத்தியிருந்தனர். ஆனால் தற்போதைய மோதல், தொழில்நுட்ப முதலீட்டாளர்களும் அரசியல்வாதிகளும் இடையே நம்பிக்கையின் பிளவுகளையும், வணிகச் சூழல்களில் அரசியல் தலையீடுகளால் உருவாகும் குழப்பத்தையும் வெளிக்கொணர்கிறது.