வெளிநாடுகளில் விலங்குகளை உணவாக சாப்பிடும் கலாசாரங்களில் வித்தியாசமான உணவுகள் பரிமாறப்படுவது வழக்கம். ஆனால், சில உணவுகள் உடல்நலத்திற்கு பெரும் பாதிப்புகளை ஏற்படுத்தும் அபாயமும் உள்ளது. இப்படி உணவு அனுபவம் ஒன்றில் விபரீத நிலைக்கு சென்றுள்ள சம்பவம் லாவோசில் நடந்துள்ளது. நைஜீரியாவை சேர்ந்த டிக்டாக் பிரபலர் டான் பிளாக், லாவோசிற்கு பயணம் சென்றபோது வறுத்த தவளை சாப்பிட்டுள்ளார். அதனைத் தொடர்ந்து அவரது முகம் முழுவதும் வீங்கி, கடுமையான உடல்நலக் கோளாறு ஏற்பட்டுள்ளது.
View this post on Instagram
“@donblack694” என்ற டிக்டோக் கணக்கை வைத்திருக்கும் டான் பிளாக், வறுத்த தவளையை சாப்பிட்ட பிறகு ஏற்பட்ட நிலையை வீடியோவாக வெளியிட்டுள்ளார். வீடியோவில், தவளை இறைச்சியை சாப்பிட்டதற்கு முந்தைய மற்றும் பின்னைய தருணங்களை காட்டியுள்ளார். “வறுத்த தவளை சாப்பிட்ட பிறகு, என் வாய் ஒரு கால்பந்து போல வீங்கியது. இது என் வாழ்க்கையில் வந்த மிக மோசமான அனுபவம்,” என அவர் கூறியுள்ளார். இந்த வீடியோ, இணையத்தில் வைரலாகி, அவரது பின்தொடர்பவர்களிடையே பெரும் பரபரப்பை ஏற்படுத்தியுள்ளது.
இந்த வீடியோவின் பின்னர் சமூக ஊடகங்களில் பலர் விமர்சனம் தெரிவித்து வருகின்றனர். “இவை உணவா?”, “இயற்கையை கேலி செய்தால் இப்படித்தான் பதில் கிடைக்கும்,” “விலங்குகள் வேடிக்கைக்கா உணவுக்கா?” எனக் கேள்வி எழுப்பியுள்ளனர். மேலும், “நீங்கள் சாப்பிடக்கூடாததை சாப்பிட்டதால்தான் இப்படி உங்கள் உடம்பு கெட்டுப்போனது” எனக் கடும் விமர்சனங்கள் குவிந்துள்ளன. இதன் மூலம், தவளை போன்ற விலங்குகளை உணவாக பயன்படுத்தும் கலாசாரங்கள் மீதான விவாதமும் எழுந்துள்ளது.
இந்த சம்பவத்தால், டான் பிளாக் தீவிரமான மருத்துவ சிகிச்சை எடுத்து குணமடைந்த பின்னர், தனது பின்தொடர்பவர்களுக்கு எச்சரிக்கை விடுத்துள்ளார். “தவளை போன்ற வினோத உணவுகளை சாப்பிடுவதை சோதனைக்காகவேனும் முயற்சி செய்ய வேண்டாம். இது எனக்கு ஏற்பட்டது போல, உங்களுக்கும் ஆபத்தாக முடிவடையலாம்” என தெரிவித்துள்ளார். அவரது வீடியோ தற்போது சமூக ஊடகங்களில் பெரும் அளவில் பரவி, உணவு பாதுகாப்பு மற்றும் உடல்நலத்தில் கவனம் தேவை என்பதை வலியுறுத்துகிறது.
