உத்தரப்பிரதேச மாநில ஹமீர்பூரில் இருவரையும் கலங்க வைக்கும் சம்பவம் நிகழ்ந்துள்ளது. கன்ஷிராம் காலனி பகுதியைச் சேர்ந்த ராம் சிங்கின் மனைவி ராம்காலி (வயது 45), தனது மகன் அனில் குமார் (வயது 23) தற்கொலை செய்யப்போவதாக மிரட்டியதைத் தொடர்ந்து, அவரை காப்பாற்ற கூரையில் ஏறிச் சென்றுள்ளார். இந்தநிலையில் தாயும் மகனும் இருவரும் அருகிலிருந்த இரண்டு மாடி வீட்டின் கூரையிலிருந்து தவறி சுமார் 30 அடி உயரத்தில் இருந்து கீழே விழுந்தனர்.

விழுந்ததில் ராம்காலி தலைகீழாக விழுந்ததாக தெரிவிக்கப்பட்டுள்ளது. இருவரும் மாவட்ட அரசு மருத்துவமனையில் சேர்க்கப்பட்டனர். ராம்காலியின் நிலைமை மோசமாக இருந்ததால், அவரை உடனடியாக கான்பூர் ஹாலட் மருத்துவமனையும் பின்னர் லக்னோவுக்கும் அனுப்ப பரிந்துரைக்கப்பட்டது. ஆனால், மருத்துவமனை செல்லும் வழியில் அவர் உயிரிழந்தார். அவரது மகன் அனில் குமாருக்கு பலத்த காயம் ஏற்பட்ட நிலையில், தற்போது சிகிச்சை பெற்று வருகிறார்.

இந்த சம்பவம் தொடர்பான தகவலை காவல்துறையினருக்கு உறவினர்கள் தெரிவிக்காமல், உடலை நேரடியாக ஹமீர்பூருக்குக் கொண்டு வந்து இறுதிச் சடங்குகளை மேற்கொண்டதாகத் தகவல் வெளியாகியுள்ளது. இதையடுத்து ஹமீர்பூர் சதார் கோட்வாலி காவல் நிலைய இன்ஸ்பெக்டர் ராகேஷ் குமார் கூறியதாவது, “சம்பவம் குறித்து அதிகாரப்பூர்வ தகவல் பெறப்படவில்லை. இருப்பினும், இது தொடர்பாக விசாரணை நடைபெற்று வருகிறது. விசாரணையின் அடிப்படையில் தேவையான சட்ட நடவடிக்கை எடுக்கப்படும்,” என்றார்.

மேலும் இந்தச் சம்பவம் மாவட்டத்தில் பெரும் சோகத்தையும் அதிர்ச்சியையும் ஏற்படுத்தியுள்ளது.