திண்டுக்கல் மாவட்டத்தில் உள்ள ஒட்டன்சத்திரத்தை அடுத்த சின்ன குளிப்பட்டி கிராமத்தில் நடந்த சோகமான சம்பவம் ஒன்றால் அந்தப் பகுதி மக்கள் அதிர்ச்சியில் உள்ளனர். ஒரே குடும்பத்தைச் சேர்ந்த நான்கு பேர் – தாய், மகள் மற்றும் இரண்டு பேத்திகள் சடலமாக மீட்கப்பட்டுள்ளனர்.

சின்ன குளிப்பட்டியைச் சேர்ந்த செல்லம்மாள் (வயது 65), அவரது மகள் காளீஸ்வரி (45) மற்றும் பேத்திகள் லித்திக்ஸா (7), தீப்தி (5) ஆகியோர் இவ்வாறு உயிரிழந்தனர். காளீஸ்வரியின் மகள் பவித்ரா (28) கடந்த 9 ஆண்டுகளுக்கு முன்னர் கரூர் மாவட்டம் பள்ளபட்டியைச் சேர்ந்த சௌந்தபுரத்தைச் சேர்ந்த பிரபாகரனுடன் திருமணம் செய்து கொண்டார். இவர்களுக்கு இரண்டு பெண் குழந்தைகள் உள்ளனர். குடும்பக் கருத்து வேறுபாடுகள் காரணமாக பவித்ரா கடந்த ஒரு மாதமாக தனது தாயார் வீட்டில் தங்கியிருந்தார்.

இந்நிலையில், பவித்ரா ஒரு தனிப்பட்ட நபருடன் தொடர்பு வைத்திருந்ததாக கூறப்படுகிறது. அந்த நபருடன் ஜூன் 17 ஆம் தேதி மாலை 6 மணியளவில் பவித்ரா வீட்டை விட்டு வெளியேறியுள்ளார். இதனால் ஏற்பட்ட அவமானம் மற்றும் மன வேதனையால், பாட்டி செல்லம்மாள் மற்றும் மகள் காளீஸ்வரி ஆகியோர், பேத்திகளுக்குக் விஷம் கொடுத்துப் படுகொலை செய்தபின், வீட்டிலுள்ள மின்விசிறியில் தூக்குப்போட்டு தற்கொலை செய்து கொண்டிருக்கலாம் என போலீசார் சந்தேகிக்கின்றனர்.

தகவல் அறிந்து சம்பவ இடத்திற்கு விரைந்த இடையகோட்டை காவல் துறையினர், நான்கு பேரின் உடல்களையும் மீட்டு, உடற்கூறாய்வுக்காக திண்டுக்கல் அரசு மருத்துவமனைக்கு அனுப்பி வைத்தனர். இந்த சம்பவம் சம்பந்தமாக வழக்குப் பதிந்து விரிவான விசாரணை நடைபெற்று வருகிறது.

இந்தக் கொடூர சம்பவம் அந்தப் பகுதியில் பெரும் சோகத்தையும், பரபரப்பையும் ஏற்படுத்தியுள்ளது. குடும்பக் குழப்பங்கள் எந்த அளவுக்கு ஆழமாக பாதிப்பை ஏற்படுத்தக்கூடும் என்பதற்கு இது ஒருவகைத் துயர்ந்த எடுத்துக்காட்டாக அமைந்துள்ளது.