நெல்லை மாவட்டம் வள்ளியூர் மின்வாரிய குடியிருப்பு காலனியில் உள்ள வீட்டில் தனியாக வசித்து வந்த மூதாட்டி ஒருவர், மர்ம நபர்களால் கொலை செய்யப்பட்டு, அவரது நகைகள் கொள்ளையடிக்கப்பட்ட சம்பவம் பரபரப்பை ஏற்படுத்தியுள்ளது.

அந்த பகுதியில் வசித்து வந்தவர் அர்ஜூனன் (78). மின்வாரியத்தில் என்ஜினீயராக பணியாற்றி ஓய்வு பெற்ற இவர், சில மாதங்களுக்கு முன் உயிரிழந்தார். அவரது மனைவி ருக்மணி (71), கணவரின் மறைவுக்குப் பிறகு தனியாகவே வாழ்ந்து வந்தார். இவர்களுக்கு பாலசுந்தர், செந்தில் முருகன் என்ற இரு மகன்களும், சண்முகசுந்தரி என்ற மகளும் உள்ளனர். மூத்த மகன் பாலசுந்தர், மகேந்திரகிரியில் உள்ள இஸ்ரோ மையத்தில் பணியாற்றி, பெற்றோர் வீட்டு அருகே குடும்பத்துடன் வசித்து வருகிறார். மற்றவர்கள் வெளியூரில் வசிக்கின்றனர்.

நேற்று காலை, தாயாருக்கு சாப்பாடு கொடுப்பதற்காக வந்த பாலசுந்தர், வீட்டின் முன்பக்க கதவு பூட்டியிருந்ததை பார்த்து, அவரது பெயரை சொல்லி அழைத்தார். பதில் கிடைக்காததால் சந்தேகமடைந்த அவர், வீட்டின் பின்புறம் சென்று பார்த்தபோது கதவு திறந்திருந்தது. உள்ளே சென்று பார்த்தபோது, ருக்மணி தலையில் ரத்தக்காயங்களுடன் உயிரிழந்த நிலையில் கிடந்தார்.

மேலும், அவரது கழுத்தில் இருந்த 7 பவுன் தங்கச் சங்கிலி மற்றும் கைகளில் இருந்த 7 பவுன் வளையல், மொத்தம் 14 பவுன் நகைகள் கொள்ளையடிக்கப்பட்டு இருந்தது தெரியவந்தது. பீரோவில் இருந்த பிற நகைகள் மட்டும் காப்பாற்றப்பட்டன.

தகவல் பெற்றவுடன் வள்ளியூர் போலீசார் சம்பவ இடத்திற்கு விரைந்து சென்று, உடலை கைப்பற்றி உடற்கூறு பரிசோதனைக்கு அனுப்பி, கொலை மற்றும் கொள்ளை தொடர்பாக வழக்குப்பதிவு செய்து விசாரணை தொடங்கியுள்ளனர். மர்மநபர்கள் பின்கதவின் வழியாக வீட்டிற்குள் நுழைந்து கொலை செய்திருக்கலாம் என சந்தேகம் எழுந்துள்ளது.

இச்சம்பவத்துக்கான காரணம் மற்றும் குற்றவாளிகள் யார் என்பதையும் கண்டறிந்து கைது செய்ய போலீசார் வலைவீசி தேடி வருகின்றனர். இந்த சம்பவம் அப்பகுதியில் பெரும் சோகத்தையும் அதிர்ச்சியையும் ஏற்படுத்தியுள்ளது.