கேரள மாநிலம் அழீக்கோடு நீர்காவு பகுதியில் உள்ள முசிரியன் கோயிலில் நடந்த பட்டாசு வெடி விபத்தில் 12 வயது குழந்தை உட்பட 5 பேர் காயமடைந்தனர். இதில் ஒருவரின் நிலை கவலைக்கிடமாக இருப்பதால் மங்களூரு மருத்துவமனையில் தீவிர சிகிச்சை அளிக்கப்பட்டு வருகிறது. சம்பவம் அதிகாலை 4 மணியளவில் நிகழ்ந்ததாக போலீசார் தெரிவித்துள்ளனர். விழாவில் வானத்தில் வெடிக்கவிருந்த ஒரு பட்டாசு எதிர்பாராதவிதமாக கூட்டத்தில் விழுந்து வெடித்ததால், அங்கு இருந்த பக்தர்கள் பலர் தீக்காயம் அடைந்தனர்.

விழாக்கால நிகழ்ச்சியாக தெய்யம் நடிப்பு கோயிலில் நடைபெற்றுக்கொண்டிருந்த போது, பக்தர்கள் பெருமளவில் கூடியிருந்தனர். அந்த நேரத்தில் பட்டாசு வெடித்ததால் அருகில் இருந்தவர்கள் அலறி ஓடினர். சம்பவ இடத்திற்கு விரைந்த போலீசார், காயமடைந்தவர்களை அருகிலுள்ள மருத்துவமனைக்கு அனுப்பி வைத்தனர். இந்த விபத்து பாதுகாப்பு குறைபாட்டால் நடந்ததா? என்பது குறித்து போலீசார் விசாரணை மேற்கொண்டு வருகின்றனர்.

இந்த நிலையில் வளப்பட்டணம் போலீசார் சம்பவம் குறித்து விசாரணையை தொடங்கி, கோயில் நிர்வாகத்திடம் பட்டாசு வெடிக்க எந்த அனுமதிகள் பெற்றிருந்தார்கள்? பாதுகாப்பு முன்னெச்சரிக்கைகள் என்னென்ன? போன்ற கேள்விகளை எழுப்பியுள்ளனர். கோயில்களில் விழாக்கள் மற்றும் தீப்புகை தொடர்பான நடவடிக்கைகளில் கூடுதல் பாதுகாப்பு தேவை என்று பொதுமக்கள் கருத்து தெரிவித்துள்ளனர். மேலும், கோயில் நிர்வாகத்தினர் மற்றும் விழா ஏற்பாட்டாளர்கள் சட்டப்பூர்வ அனுமதிகள் பெற்றிருந்தார்களா? என்பதையும் போலீசார் ஆய்வு செய்து வருகின்றனர்.