பணக்கார வேட்பாளர்கள்….. வசந்தகுமார் , கனிமொழி , ஆ.ராசா என நீளும் பட்டியல்…!!

மக்களவை தேர்தலில் தமிழகத்தில் வேட்புமனு செய்த பணக்கார வேட்பாளர்கள் பட்டியல் வெளியாகியுள்ளது .

வருகின்ற ஏப்ரல் 18_ஆம் தேதி மக்களவை தேர்தல் வாக்குப்பதிவு நடைபெறுமென தேர்தல்  அறிவித்தது. இதையடுத்து தேர்தலில் போட்டியிடும் வேட்பாளர்கள் கடந்த 6 நாட்களாக வேட்புமனு தாக்கல் செய்து வருகின்றனர்.இந்நிலையில் முக்கிய அரசியல் கட்சி வேட்பாளர்கள் வேட்பு மனு தாக்கல் செய்துள்ள நிலையில் அவர்கள் வேட்புமனுவில் குறிப்பிட்டுள்ள  சொத்து விவரங்கள் குறித்து பார்க்கலாம் .

கன்னியாகுமரி வசந்தகுமார் : 

கன்னியாகுமரி மக்களவைத் தொகுதியில் தேர்தலில் காங்கிரஸ் கட்சியின் சார்பில் போட்டியிடும் வசந்தகுமார் சுமார் 230 கோடி அளவுக்கு அசையும் சொத்தும் , அசையா சொத்துக்கள் சுமார் 152 கோடி மதிப்பில் இருப்பதாக தெரிவித்துள்ளார் . 2017-18 ஆம் நிதியாண்டில் தன்னுடைய வருமானம் 29 கோடி ரூபாய் எனவும் வங்கிகளில் தனக்கு 154 கோடி ரூபாய் கடன் இருப்பதாகவும் வசந்தகுமார் வேட்புமனுவில் குறிப்பிட்டுள்ளார் .

நீலகிரி முன்னாள் மத்திய அமைச்சர் ஆ.ராசா : 

நீலகிரி நாடாளுமன்ற தொகுதியில் திமுக சார்பில் போட்டியிடும் முன்னாள் மத்திய அமைச்சர் ஆ. ராசா தன் பெயரில் 2 கோடியே 80 லட்சம் ரூபாய் மதிப்பில் அசையும் சொத்துக்களும் , 31 லட்சம் ரூபாய் மதிப்பில் அசையா சொத்துக்களும் இருப்பதாக தெரிவித்தார் .2017-18_ஆம் ஆண்டு நிதியாண்டில் தன்னுடைய வருமானம் 9 லட்சத்து 95 ஆயிரம் ரூபாய் எனவும் ராசா வேட்புமனுவில் தெரிவித்துள்ளார்.

தூத்துக்குடி  பாஜக மாநில தலைவர் தமிழிசை சௌந்தரராஜன் :

தூத்துக்குடி பாராளுமன்ற தொகுதியில் பாஜக சார்பில் போட்டியிட்டும்  தமிழிசை சௌந்தரராஜன் தனக்கு சுமார் ஒரு கோடியே 50 லட்சம் ரூபாய் மதிப்பில் அசையும் சொத்துக்களும் , 50 லட்சம் ரூபாய் மதிப்பில் அசையா சொத்துக்களும் , வங்கியில் ஒரு லட்சத்து 87 ஆயிரம் ரூபாய் கடன் இருப்பதாகவும் வேட்புமனுவில் தெரிவித்துள்ளார் . மேலும் 2018-19 ஆம் நிதி ஆண்டில் தனது வருமானம் சுமார் 93 ஆயிரம் ரூபாய் எனவும் அவர் குறிப்பிட்டுள்ளார் .

திருச்சி திருநாவுக்கரசர் :

திருச்சி பாராளுமன்ற தொகுதியில் காங்கிரஸ் கட்சியின் வேட்பாளராக போட்டியிடும் திருநாவுக்கரசர் 4 லட்சத்து 38 ஆயிரம் ரூபாய் மதிப்பில் அசையும் சொத்துக்களும் , சுமார் 27 லட்ச ரூபாய் மதிப்பில் அசையா சொத்துக்களும் தனக்கு இருப்பதாக குறிப்பிட்டுள்ளார் . மேலும் வங்கி கடன் 40,000  இருப்பதாகவும், 2018-19 ஆம் நிதி ஆண்டில் தனது வருமானம் 5 லட்சத்து 56 ஆயிரம் எனவும் வேட்புமனுவில்  குறிப்பிட்டுள்ளார் .

தூத்துக்குடி திமுக மாநிலங்களவை உறுப்பினர் கனிமொழி :

தூத்துக்குடி பாராளுமன்ற தொகுதியில் திமுக சார்பில் போட்டியிடும் கனிமொழி தனக்கு 21 கோடி ரூபாய் மதிப்புள்ள அசையும் சொத்துக்களும் ,  8 கோடியே 92 லட்சம் ரூபாய் மதிப்பில் அசையா சொத்துக்களும் உள்ளதாக தெரிவித்தார் . கடந்த 2018-19 ஆண்டில் நிதி ஆண்டில் சுமார் 1 கோடியே 40 லட்சம் தனக்கு வருமானம் கிடைத்துள்ளதாகவும் கனிமொழி தெரிவித்துள்ளார் . மேலும் சுமார் ஒரு கோடியே 92 லட்சம் தனக்கு வங்கி கடன் இருப்பதாகவும் வேட்புமனுவில் குறிப்பிட்டுள்ளார் .