2026 சட்டப்பேரவைத் தேர்தலை முன்னிட்டு, தமிழக வெற்றிக் கழகத் தலைவர் நடிகர் விஜய் இன்று தனது பிரசாரத்தை திருச்சியில் தொடங்கினார்.

காலைவேளையில் திருச்சி விமான நிலையம் வந்தடைந்த விஜய், அங்கிருந்து மரக்கடை வரை சுமார் 8 கிலோமீட்டர் தொலைவில், நான்கு மணி நேரம் தொடர்ந்து தன் ஆதரவாளர்களுடன் சாலை ஊர்வலமாக சென்றார். பின்னர் மரக்கடை பகுதியில் நடைபெற்ற பொதுக்கூட்டத்தில் பேசும்போது, “திருச்சியில் இரண்டு அமைச்சர்கள் இருக்கிறார்கள்.

ஆனாலும் இங்கு மக்கள் பிரச்னைகள் தீர்க்கப்படவில்லை. காவிரியில் தண்ணீர் இருக்கிறதே என்றாலும் குடிநீர் பிரச்னை தொடருகிறது. அதற்குப் பதிலாக மணல் கொள்ளை நடக்கிறது” என அவர் கடுமையாக விமர்சித்தார்.

விஜய் குறிப்பிட்டிருப்பது, திருச்சியைச் சேர்ந்த அமைச்சர்கள் கே.என்.நேரு மற்றும் அன்பில் மகேஷ் ஆகியோரையே என அரசியல் வட்டாரங்கள் பார்க்கின்றன. மேலும், பெண்கள் பாதுகாப்பு குறைபாடு, அரசின் நிறைவேற்றப்படாத வாக்குறுதிகள் போன்ற முக்கிய விஷயங்களையும் அவர் பேசினார்.

விஜயின் இந்த பேச்சு, திருச்சி மக்களிடையே பெரும் வரவேற்பை பெற்றதாகவும், கூட்டத்தில் பெண்கள், இளைஞர்கள், குடும்பத்தினர் என பலரும் பெருமளவில் பங்கேற்றதாகவும் தெரியவந்துள்ளது.

இந்த சூழ்நிலையில், சென்னையிலிருந்து திருச்சி விமானம் மூலம் வந்த அமைச்சர் அன்பில் மகேஷிடம் செய்தியாளர்கள், “விஜய் உங்களை விமர்சித்திருக்கிறார்… கூட்டம் அதிகம் வந்ததோ?” எனக் கேள்வி எழுப்பினர். அதற்கு பதிலளித்த அவர், “இப்போதுதான் விமானம் மூலம் வந்துள்ளேன்.

முழு விவரங்களையும் பார்த்ததில்லை. பார்த்தபின் கருத்து தெரிவிக்கிறேன். கூட்டம் வந்திருக்கலாம், ஆனால் அந்த கூட்டத்தில் வந்தவர்களின் வீடுகளில் உள்ள அண்ணன், தங்கை போன்றவர்கள் தமிழ்நாடு அரசின் நலத்திட்டங்களால் பயன்பெற்றிருப்பார்கள். மகளிர் உரிமைத் திட்டம், புதுமைப் பெண் திட்டம், காலை உணவு திட்டம் என பல திட்டங்கள் மக்கள் மனதில் பதிந்துள்ளன” என்று பதிலளித்தார்.