1 இல்ல 2 இல்ல!… 6 பூகம்பங்களை தாங்கி இன்றும் நிலைத்து நிற்கும் தஞ்சை கோவில்…. நடிகர் விக்ரம் ஸ்பீச்….!!!!

கல்கி எழுதிய நாவலை அடிப்படையாக கொண்டு மணிரத்னம் இயக்கியுள்ள பொன்னியின் செல்வன் படம் வருகிற 30-ஆம் தேதி திரையரங்குகளில் வெளியாகவுள்ளது. இவற்றில் நடிகர்கள் விக்ரம், ஜெயம்ரவி, கார்த்தி, ஜெயராம், பார்த்திபன், சரத்குமார், நடிகைகள் ஐஸ்வர்யா ராய், திரிஷா, ஐஸ்வர்யா லட்சுமி உட்பட பலர் நடித்து இருக்கின்றனர். தமிழ், தெலுங்கு, மலையாளம், கன்னடம், இந்தி என 5 மொழிகளில் நேரடியாக இப்படம் வெளியாக இருக்கிறது. இதனையொட்டி படக்குழுவினர் இப்போது ஒவ்வொரு மாநிலங்களுக்கும் சுற்றுப் பயணம் சென்று படத்தை விளம்பரப்படுத்தும் பணியில் ஈடுபட்டு வருகின்றனர்.

அந்த அடிப்படையில் மும்பையில் நடந்த புரமோஷன் நிகழ்ச்சியில் பொன்னியின் செல்வன் படக்குழுவினர் பங்கேற்று செய்தியாளர்களின் கேள்விகளுக்கு பதிலளித்துப் பேசினர். அப்போது பத்திரிக்கையாளர் ஒருவர் வரலாற்றை தெரிந்துகொள்வது எந்த அளவு முக்கியமானது..? என்று கேள்வியெழுப்பினார். இதற்கு பதில் அளித்து நடிகர் விக்ரம் பேசியதாவது “நாம் எகிப்திலுள்ள பிரமீடுகள் பற்றி பேசுகிறோம். அதனை எப்படி கட்டியிருப்பார்கள் என்றெல்லாம் யோசிக்கிறோம். எனினும் நம் இந்தியாவில் நிறைய கோவில்கள் இருக்கிறது. அவற்றில் உயரமான கோபுரத்தை கொண்ட கோவில் எனில் அது தஞ்சை பெரியகோவில் தான்.

சோழமன்னர் ராஜராஜ சோழன் அந்த கோவிலைக் கட்டினார் என்பது குறிப்பிடத்தக்கது. உலகத்திலேயே உயரமான கோபுரத்தை உடைய கோவில் அது தான். அந்த கோவில் கோபுரத்தின் உச்சியிலுள்ள கல் மட்டும் 80 டன் எடைகொண்டது. இதற்கிடையில் பைசா நகரத்தின் சாய்ந்த கோபுரத்தைப் பார்த்து நாம் வியப்படைகிறோம், பாராட்டுகிறோம். இருப்பினும் தஞ்சை பெரியகோவில் சுமார் ஆயிரம் வருடங்களுக்கு மேலாக 6 பூகம்பங்களை தாங்கி இன்றுவரை நிற்கிறது. அதிலும் எந்த வகையான பிளாஸ்டர்களும் இன்றி அந்த கோவில் கட்டப்பட்டுள்ளது. அது எப்படி சாத்தியமானது எனில் முதலில் சுற்றுச்சுவர், பிறகு 6 அடி நீளத்துக்கு தாழ்வாரம் அமைத்து, மையப்பகுதியில் கோவிலை கட்டி இருக்கின்றனர். இதனால்தான் அது இத்தனை பூகம்பங்களையும் தாண்டி இன்றும் நிலைத்து நிற்கிறது. எந்திரங்கள் எதுவும் இன்றி , யானைகள், குதிரைகள் மற்றும் மனிதர்களைக் கொண்டு அவ்வளவு பெரிய கட்டுமானத்தைக் கட்டியுள்ளனர்” என்று  நடிகர் விக்ரம் பேசினார். அவரது இந்த பேச்சு சமூகவலைதளங்களில் வைரலாகி வருகிறது.