பாகிஸ்தானில் வெள்ள பாதிப்பால்…. இத்தனை லட்சம் மக்களுக்கு உணவு நெருக்கடியா….? ஐ.நா சபை அறிவிப்பு….!!

பாகிஸ்தான் நாட்டில் கடந்த ஜூன் மாதம் பருவமழை தொடங்கியுள்ளது. இங்கு பல நாட்களாக நீடித்த கனமழையால் நாடு முழுவதும் வெள்ளப்பெருக்கு ஏற்பட்டுள்ளது. ஒட்டுமொத்த நாட்டில் 3-ல் 1 பங்கு தண்ணீரில் மூழ்கியுள்ளது. இந்த வெள்ளப்பெருக்கால் 3 கோடியே 30 லட்சம் மக்கள் பாதிக்கப்பட்டுள்ளனர். இங்கு வெள்ளத்தினால் உயிரிழந்தோரின் எண்ணிக்கையானது 1,693 ஆக அதிகரித்துள்ளது. தற்போது இங்கு மழை குறைந்து வெள்ளம் வடியத்தொடங்கி மெதுவாக இயல்பு நிலைக்கு திரும்பி வருகின்றது.

இந்நிலையில் பாகிஸ்தானில் வெள்ளத்தால் பாதிக்கப்பட்டவர்களில் 57 லட்சம் மக்கள் உணவு நெருக்கடியை எதிர்கொள்வார்கள் என்று ஐக்கிய நாடுகள் சபை தெரிவித்துள்ளது. இது குறித்து ஐக்கிய நாடுகள் சபையின் மனிதாபிமான விவகாரங்களின் ஒருங்கிணைப்பு அமைப்பு வெளியிட்டுள்ள சமீபத்திய அறிக்கையில் கூறியதாவது, “தற்போதைய வெள்ளம் பாகிஸ்தானில் உணவுப் பாதுகாப்பின்மையை அதிகரிக்கும். மேலும் வெள்ளம் பாதித்த பகுதிகளிலுள்ள 57 லட்சம் மக்கள் செப்டம்பர் மாதம் முதல் நவம்பர் மாதம் வரை உணவு நெருக்கடியை எதிர்கொள்வார்கள்” என தெரிவித்துள்ளது என்பது குறிப்பிடத்தக்கது.