பங்குனி திருவிழா கொண்டாட்டம்… பெண்கள் சிறப்பு பொங்கல் வழிபாடு… திரளான பக்தர்கள் பங்கேற்பு..!!

சிவகங்கை மாவட்டம் கண்ணமங்கலம்பட்டி பட்டத்தரசி அம்மன் கோவிலில் பங்குனி திருவிழாவை முன்னிட்டு பெண்கள் பொங்கல் வைத்து வழிபாடு செய்தனர்.

சிவகங்கை மாவட்டத்தில் உள்ள கண்ணமங்கலப்பட்டியில் சிறப்பு வாய்ந்த பட்டத்தரசி அம்மன் கோவில் உள்ளது. இந்த கோவிலில் பங்குனி திருவிழா கடந்த 25-ஆம் தேதி காப்பு கட்டுதலுடன் கோலாகலமாக தொடங்கியது. விழாவை முன்னிட்டு காலை, மாலை என இருவேளையும் கோவிலில் சிறப்பு பூஜைகள் நடைபெற்று வருகிறது. நேற்று காலை 9 மணி அளவில் ஏராளமான பக்தர்கள் கோவில் மந்தை கூடம் முன்பு இருந்து பால்குடம் எடுத்து கோவிலுக்கு ஊர்வலமாக வந்தனர்.

கோவில் வளாகத்தில் மாலை 6 மணிக்கு பொங்கல் வைத்து பெண்கள் வழிபாடு செய்தனர். குழந்தைகளை நோய் நொடியிலிருந்து பாதுகாக்க கரும்பு தொட்டில் நேர்த்திக்கடன் செலுத்தப்பட்டது. பக்தர்கள் விழாவை முன்னிட்டு தீச்சட்டி எடுத்தும் நேர்த்திக்கடன் செலுத்தினர். விழாவிற்கான முன் ஏற்பாடுகளை கோவில் நிர்வாகத்தினர் செய்திருந்தனர்.